28 de septiembre día internacional polos derechos sexuales y reproductivos de les muyeres

Güei, 28 de setiembre, otra vuelta tenemos que reivindicar los derechos sexual y reproductivu de les muyeres, porque la llei Orgánica 2/2010, de 3 de marzu, de salú sexual y reproductiva y de la interrupción voluntaria del embaranzu del estáu español entá nun s’implementó. A lo llargo d’estos diez años, queda patente la falta d’interés per parte de les autoridaes polítiques para desenvolver el conteníu lexislativu. Asina nel Artículu 5 no que cinca a los oxetivos de l’actuación de los poderes públicos recuéyese:

1. Los poderes públicos nel desarrollu de les sos polítiques sanitaries, educatives y sociales van garantizar:

a) La información y l’educación afeutivu sexual y reproductiva nos conteníos formales del sistema educativu. Esti oxetivu llueñe de desenvolvese, naquelles autonomíes onde s’implementó con programes educativos como’l casu de SKOLAE foi denunciáu, criticáu, afrelláu y a la fin reconducíu dexándolu en daqué secundario, a pesar de ganar la reconocencia de la Unesco.

b) L’accesu universal a los servicios y programes de salú sexual y reproductiva. La sanidá, responsabilidá de les comunidaes autónomes, nun ta funcionando d’igual manera ente unes y otres. Dalgunes desenvolvieron programes d’escelente calidá, otres caltienen programes obsoletos y ensin perspectiva feminista.

c) L’accesu a métodos seguros y eficaces que dexen regular la fecundidá. L’accesu a ciertos anticonceutivos suel quedar fuera del sistema de salú y el so preciu facelos inaccesibles a la totalidá de la población.

d) La eliminación de toa forma de discriminación, con especial atención a les persones con dalgún tipu de discapacidá, a les que se-yos va garantizar el so derechu a la salú sexual y reproductiva, estableciendo pa elles los sofitos necesarios según la so discapacidá. Hai que desraigonar la esterilización forzada qu’entá se produz n’España. L’informe de CERMI de 2017 recueye:

“La práctica de la esterilización forzosa forma parte d’un patrón más ampliu de denegación de los derechos humanos de les muyeres y neñes con discapacidá. Esta denegación inclúi tamién la esclusión de manera sistemática de los sistemes d’atención a la salú reproductiva y sexual, torgues na elección de métodos anticonceutivos voluntarios, un enfoque na supresión menstrual, una atención ruina a lo llargo l’embaranzu y nel partu, albuertos involuntarios, y la denegación del derechu a ser madre”.

https://www.consaludmental.org/publicaciones/Esterilizacion-forzosa-mujeres-discapacidad.pdf

e) La educación sanitaria integral y con perspectiva de xéneru sobre salú sexual y salú reproductiva. El informe solombra del Conveniu d’Istambul recueye que la formación con perspectiva de xéneru nun figura en práuticamente en nengún de los currículos de medicina o enfermería.

Inclusive cola implantación plena de la Llei Orgánica, queden coses por facer. Los nuesos derechos sexual y reproductivu siempres tán n’entredichu y “colinguen d’un filu”. Nun escaezamos l’intentu de Ruiz Gallardón de derogar esta llei ya imponer otra muncho más conservadora y que mermaba derechos. Nun lo consiguió, pero tenemos de siguir sollertes.

La situación ye entá peor a nivel mundial. Hai países, como Nicaragua, República Dominicana, El Salvador, El Vaticanu y Malta, onde inda obliguen a les muyeres a llevar a términu’l so embaranzu so pena de cárcel.

La llucha de les muyeres polos nuesos derechos sexuales y reproductivos ye y tien de ser  global. L’alianza ente muyeres ye más fuerte si sofitamos nel derechu a decidir sobre los nuesos cuerpos.

Dende la Organización de Muyeres de la Confederación Intersindical esiximos:

●         La retirada de la obligatoriedá del consentimientu de proxenitor y proxenitora pa poder albortar, nel casu de menores d’edá.

●         Que l’albuertu sía llibre, gratuitu, calidable y que tea garantizáu pola sanidá pública.

●         Una educación afeutivu sexual efectiva, en tolos niveles educativos.

●         L’accesu llibre y gratuitu de tola población a los métodos anticonceutivos, y que estos tean garantizaos pola sanidá pública.

Dende la Secretaría de la Muyer de SUATEA animámosvos a participar na concentración que va tener llugar güei, 28 de setiembre, a les 19:00 na plaza del Conceyu de Xixón,

 PORQUE MOS SIGUEN SOBRANDO LES RAZONES

28 de setiembre 2020

Secretaría de la Muyer de SUATEA Organización

Uviéu, 28 de septiembre de 2020