25 N: Nun ye un casu aislláu, ye’l patriarcáu

25 N: NUN YE UN CASU AISLLÁU , YE’L PATRIARCÁU .

L’altu comisionáu de la ONU pa los Derechos Humanos, Volker Türk, sollertó sol fuerte retrocesu n’igualdá de xéneru que se ta viendo nos últimos años y que , en munchos llugares, la misoxinia ta casi normalizada sía per medios dixitales o non.

Partiendo d’esta premisa yá podemos asitianos nes poques meyores que se llograron nos últimos tiempos na Unión Europea y nel restu del mundu en materia d’igualdá y, poro, en violencia machista .

Culpabilidá , vergüenza…nun vuelvas sola a casa , nun vistas asina , curiáu colo que bebes, nun bailles provocando … si te pegó él, meréceslo; nun yes bona madre ; fales con toos; yes una buscona… VAS SER DE MIO O DE NAIDE MÁS, VOI QUITATE LO QUE MÁS QUIES…SI LO CUNTES A DAQUIÉN,MÁTOTE !!!!

L’abogacía española , CGAE, alerta del incumplimientu del Pactu contra la Violencia de Xéneru . Reclamen que se garantice l’asistencia de les víctimes dende primero que s’interponga la primer denuncia , amás que la Policía y la Guardia Civil tengan la obligación d’atender a cualquier víctima de violencia machista . Coles mesmes, los Cuerpos de Seguridá del Estáu piden refuerzos y más plantiya pa poder llegar a toos estos casos con efectividá y a tiempu.

El 98% de les muyeres sufrieron dalguna vegada acosu caleyeru . El 25% convive con ello a diariu. Consecuencies: cambeos de rutines, ansiedá y mieu . (Universidá de Córdoba )

A últimos del pasáu mes de setiembre 99.644 casos yeren oxetu de siguimientu policial por violencia xéneru,19.325 más que l’añu anterior na mesma fecha . Rescampla que la maternidá ye un factor de riesgu , más de la metá de los casos con protección policial nel Estáu español correspuenden a víctimes con fíes y fíos menores d’edá al so cargu (52.123) que son más de 10.686 que l’añu anterior.

Esti últimu branu 19 muyeres fueron asesinaes poles sos pareyes o ex-pareyes, más de la metá de los 83 feminicidios rexistraos no que va d’añu, y 10 menores asesinaos por violencia vicaria.

Según el Sistema de Siguimientu Integral de los casos de Violencia de Xéneru (VIOGÉN), el númberu de casos activos a 31 de xunetu de 2024 yera de 95.203 lo que supón un aumentu del 18,8% en comparanza con xunetu de 2023. Más de 55.000 muyeres con protección oficial a fecha de xunetu de 2024, lo que supón una medría del 19,4% comparao con xunetu de 2023. El mayor porcentaxe de casos activos atópase ente los 31 y 45 años d’edá. Ensin escaecenos de les nueses mayores que casi una cuarta parte de les que superen los 65 años sufren violencia machista davezu nel ámbitu familiar.

El panorama desolador va siguir, si la “apatía” y el “negacionismu” énte la violencia machista per parte de la sociedá y de la clase política nun camuda escontra un compromisu real pa esaniciar esta llacra.

La Llei del “solu sí ye sí” recueye , dende va trés años, que tien d’haber 52 centros de crisis sexual en tol Estáu español. La UE otorgó 20 millones d’euros pa esti asuntu que se partieron ente tolos territorios del Estáu español. Anguaño hai 10 y dalgunos en procesu de funcionamientu . VERGÜENZA que la ministra d’igualdá, Ana Redondo , tea primiendo a estos territorios pa que faigan los sos deberes y creen estos centros, pidiendo una prórroga a la UE. Nun falta muncho pal 31 d’avientu de 2024, la gran dulda ye si esos 54 centros van tar yá n’activu…Nun son necesarios, son imprescindibles pa que les muyeres se sientan segures y ensin mieu a denunciar cualesquier tipu de violencia machista . Si los y les polítiques nun-y dan abonda importancia , como queda claro , a les agresiones machistes que les muyeres sufren nel so día a día vamos tener que ser nós les que lo digamos “claro y alto” esixendo que se cumpla la llei .

La sociedá tien de concenciase de qu’esisten diversos tipos de violencies de xéneru : V.física , V.psicolóxica , V,sexual, V.patrimonial, V.social y V.vicaria .

Toes podemos sufriles en cualquier momentu y, ensin ayuda llegal nin l’atención d’especialistes formaos/es nestes violencies, van ser difíciles de reconocer por munches muyeres maltrataes. NON SOLO MANQUEN LOS GOLPES (Pamela Palencianu ). Mentamos dellos exemplos:

Casu Pélicot: sumisión química , 10 años de violaciones y 50 mostros. El so gran valor énte tanto sufrimientu nun tien precedentes al llevar el procesu xudicial focalizando nellos, la vergüenza camudó de bandu .
Muyeres afganes: silenciu , sumisión, indeferencia …
Carmen Giménez: campeona española d’atletismu…mancadura medular tres una agresión machista.
Rebecca Cheptegei: atleta olímpica quemada pola so pareya…asesinada .
Muyeres con diversidá física o intelectual: casi el 80% presenten un riesgu cuatro vegaes mayor que’l restu de muyeres de sufrir violencia sexual.
Impunidá pa pederastes y corruptos en Murcia per parte de la “non xustica”.
Muyeres y neñes en países en conflictos bélicos que sufren sistemáticamente violencia sexual y matrimoniu infantil.
Violencia Vicaria, diez menores asesinaos por violencia vicaria esti 2024 nel Estáu español, la peor cifra de la hestoria .
Muyeres mayores de 65 años que sufren violencia machista per parte de la so pareya dende tiempos remotos y nun denuncien por una educación que les llevó a la resignación.
Muyer, Vida , Llibertá, revolución de les muyeres iranines qu’apacaba coles vides d’aquelles que se compromenten con esta revolución, con total impunidá .
Les muyeres que viven en medios rurales tarden una media de 20 años en denunciar al so agresor polos estereotipos tradicionales más enraigonaos.
Feminicidios y asesinaes nel Estáu español, 83: Irene ,Ana ,Rocío ,Cándida , Andrea , Thais…

Y un llargu Etc… con nome de muyeres.

TOOS ESTOS CASOS SON ROBLAOS Y EXECUTAOS POLA GRAN ENFERMEDÁ DEL PATRIARCÁU , EL MACHISMU .

Güei 25 de payares, otru añu más la OM denuncia : que la sociedá camina escontra un retrocesu en cuestiones d’igualdá y escontra un aumentu en cuestiones de machismu …que la clase política nun vea esta llacra como una ferramienta electoral ente unos y otros partíos…que les instituciones internacionales nun falen d’intenciones que nun ponen en práctica …y a les nueses y los nuesos mozos del futuru que tienen la clave pa nun volver tener que dicir: NUN YE UN CASU AISLLÁU , YE’L PATRIARCÁU .

El 016 atiende a toles víctimes de violencies machistes les 24 hores del día y en 53 idiomes distintos, igual que’l corréu 016-online@igualdad.gob.es; tamién s’empresta atención por aciu WhatsApp al traviés del númberu 600000016, y los menores pueden dirixise al teléfonu de la Fundación ANAR 900 20 20 10. Nuna situación d’emerxencia, puede llamase al 112 o a los teléfonos de la Policía Nacional (091) y de la Guardia Civil (062) y en casu de nun poder llamar puede recurrise a l’aplicación ALERTCOPS, dende la que s’unvia una señal d’alerta a la Policía con xeolocalización.

¡¡ Veníi a la manifestación contra la violencia contra les muyeres. !!
Uviéu, 25 de payares, 19.30 hores dende la estación de RENFE