Día Internacional escontra la Esplotación Sexual y el Tráficu de Muyeres, Neñes y Neños

La Organización de Muyeres de la Confederación Intersindical, con motivu del Día Internacional escontra la Esplotación Sexual y el Tráficu de Muyeres, Neñes y Neños, alza la voz con firmeza y enfotu: ¡nun hai igualdá mientres se merque’l cuerpu de muyeres y neñes, nun hai llibertá mientres esista trata!

El 23 de setiembre nun ye una efeméride más. Ye una xornada de memoria, denuncia, aición y llucha. Recordamos a los millones de víctimes que fueron arrincaes de les sos vides, los sos suaños y los sos cuerpos por mafies qu’organicen la esplotación, alimentándose del machismu, la probeza, el racismu y l’impunidá. La trata con fines d’esplotación sexual nun ye un fenómenu aislláu: ye una industria global que se caltién sobro la cosificación de les muyeres y la normalización de la violencia patriarcal. La trata con fines d’esplotación sexual, xunto al tráficu de drogues y el tráficu d’armes son les trés “industries” illegales que más dinero mueven mundialmente.

Ye un “negociu” que s’adautó a les nueves teunoloxíes, al traviés de la “dixitalización del espaciu prostitucional”, que permite un mayor anonimatu y flexibilizar la ufierta a la cercanía de la demanda, y tres del *COVID-19 remaneció un nuevu segmentu de negociu conocíu como “prostitución 2.0”, lo que reflexa que nun ye un fenómenu al que se-y faiga frente con midíes eficaces.

Dellos datos que nun podemos ignorar:

• Más del 70% de les víctimes de trata nel mundu son muyeres y neñes, sobro unos 40 millones de persones, y el gruesu de les demás víctimes son neños.
• La mayoría d’estes persones son captaes por aciu engaños, presión y violencia. Aprosimadamente la metá son menores d’edá.
• L’Estáu español ye un de los principales países de destín de muyeres víctimes de trata n’Europa occidental, siendo esti un de los sos llamaos turísticos pa la demanda procedente de países onde la prostitución ye una actividá fuertemente persiguida.

Dende la Organización de Muyeres desiximos:

• Educación sexual integral y feminista que promueva rellaciones llibres de violencia y dominación.
• Polítiques públiques que prioricen la prevención, la proteición y compensación de les víctimes.
• L’abolición del sistema prostitucional, que llexitima la compra de cuerpos y afita la desigualdá.
• La persecución efectiva de les mafies y de quien s’arriquecen cola esplotación sexual y de los demandantes de servicios.

Esti 23 de setiembre, salimos a les cais, a les redes y a los medios de comunicación pa glayar: ¡Nun somos mercancía! ¡Los nuesos cuerpos nun tán en venta! La llucha escontra la trata persones nun se pue separtar de la llucha pola emancipación de toles muyeres. Porque cada neña llibre, cada muyer protexida, cada rede esmantelada, ye un pasu p’hacia un mundu más xustu.

El 23 de setiembre, Día Internacional contra la Trata y la Esplotación Sexual, llevantamos la voz dende’l feminismu pa denunciar la violencia patriarcal que mercantiliza cuerpos. La nuesa llucha ye por un mundu llibre d’esclavitú sexual, onde la dignidá nun se merque nin se venda.

¡Nin una más. Nin una menos. Escontra la trata de persones, escontra la esplotación, pola vida y la dignidá de toes!