23 de setiembre día internacional contra la esplotación sexual y el trafico de persones

¡NUN MERQUES ESCLAVITÚ!

Güei, como otros años, recordamos qu’hai miles de persones – la mayoría muyeres y neñes-  que tán en situación de prostitución forciada. Recordamos los 4 millones de desplazamientos de persones qu’implica la prostitución; qu’ésta supón un codalosu negociu de 7 billones de dólares añales y la muerte en vida pa les víctimes. Un negociu bien rentable, el segundu a escala mundial dempués del tráficu d’armes.

Anguaño tamién recordamos -énte la imposibilidá manifestada poles fuercies de seguridá de conocer cuántes víctimes d’esplotación sexual hai nel Estáu español- que namás fai falta una güeyada a los polígonos y carreteres, a los barrios más degradaos de les nueses ciudaes, a los cartelos que les invaden y prometen paraísos pa ellos, a esos “hipermercaos del sexu”, pa danos cuenta de la magnitú d’esta traxedia.

Miles de muyeres y menores (anque tamién hai homes esplotaos sexualmente, la mayoría de les víctimes son del sexu femenino) son vendíes a diario como esclaves sexuales. Según l’informe de la Fiscalía nel 2012, de les 655 muyeres víctimes d’esplotación sexual namás 81 s’acoyeron al periodu de 30 díes de reflexón que contempla llei, nos que reciben asistencia xurídica y psicolóxica mientres deciden si collaboren denunciando a los responsables. Cifres risibles frente a la magnitú d’esta llaceria.

Poco camudaron les coses pa les víctimes  desque se punxo en 1999 en Dhaka (Bangladesh) el 23 de setiembre como’l Día Internacional contra la Esplotación Sexual, el Tráficu y Trata de Persones. Cada añu la cifra aumenta. La crisis, les guerres, la miseria -como enantes- siguen siendo fonte inagotable de víctimes. La prostitución, la trata y el tráficu de persones pa la esplotación sexual (pornografía, matrimonios forciaos y prostitución forciada) existen porque hai homes que merquen sexu, respondiendo asina a lo que s’espera d’ellos dende’l patriarcáu. Un modelu social que se retroalimenta d’una cultura misóxina na que xuega un papel importante la pornografía, que promueve la demanda del cuerpu de les muyeres y marca’l modelu de sexualidá y de rellaciones ente muyeres y homes, sometiendo a les primeres al dominiu d’ellos, qu’estigmatiza y criminaliza a les muyeres prostituyíes y perxudica gravemente al conxuntu de la sociedá.

Nun escaecemos les neñes secuestraes de Nixeria o en Mosul sometíes a la brutalidá de la violencia sexual, pero tampoco de toes y tolos menores esplotaos n’otros países del mundu pa satisfaer la demanda de “turismu sexual” de países más ricos.

Un 90% de les persones qu’exercen la prostitución son esplotaes por proxenetes. La mayoría son víctimes de trata. Nun tienen voluntá, nin opinión, nin llibertá. Nun escoyeron ser secuestraes, engañaes, vendíes, mercaes, esplotaes, violaes, amenazaes, golpeaes, aisllaes, asesinaes… enseñaes en cais, clubes o carreteres como muñeques rotes, con poca ropa, vexaes, arrastrando les sos cadenes énte la mirada indiferente o, inda peor, la moralina de la sociedá.

Les redes d’esplotación sexual aprovechen la falta de normativa sancionadora en dellos países pa meter les sos víctimes y empezar a esplotales de forma segura, ensin riesgos, ganando sumes increíbles de dineru a cuenta d’esta vergoñosa violencia, cruel y inhumana. Esti ye’l casu del Estáu español, destín preferíu de les mafies de prostitución y tamién país de tránsitu hacia otros llugares onde tampoco ta perseguida. Pero lo realmente importante ye qu’hai un 30% de la población masculina nel Estáu español que ye cliente asiduu de prostitución. Que merca sexu ensin importa-y que lo que ta faciendo realmente ye mercar esclaves.

Por too esto, dende la Organización de Muyer de SUATEA tamos tolos díes del añu radicalmente en contra de cualesquier forma de discriminación y violencia contra les muyeres, y la esplotación sexual ye una forma brutal y vergoñosa d’ésta, que la sociedá ignora o tolera. Por eso, güei, Día contra la Esplotación Sexual, el Tráficu y Tratar de Persones, la Organización de Muyer de SUATEA, manifestamos:

• El nuesu refugu absolutu a cualesquier forma d’esplotación y esclavitú de seres humanos. Perseguir y esaniciar el tráficu de persones con envís d’esplotación llaboral y sexual tien que ser oxetivu principal de tolos estaos.

• La nuesa esixencia al gobiernu pa que persiga y sancione a les mafies y proxenetes.

• Reivindicamos de nuevo la necesidá d’una educación afectivo- sexual, basada nel respetu a la diversidá y l’igualdá.

• Esiximos del gobiernu la protección, l’asistencia integral y la reparación de les víctimes, ensin nenguna discriminación por razón de sexu, nacionalidá, raza o credu.

Tenemos el convencimientu que pa cortar con esta esclavitú de tantes muyeres, neñes y neños, fai falta visibilizar a los primeros responsables d’ella: los homes prostituidores. ¡Nun merques esclavitú!

Uviéu, 23 de setiembre de 2014

ORGANIZACIÓN DE MUYER DE SUATEA