17 de mayu. Día internacional contra la homofobia

El próximu 17 de mayu celebrase’l Día Internacional contra la homofobia, la transfobia
y la bifobia. La fecha coincide cola de la eliminación fai yá 25 años, de la homosexualidá de la llista d’enfermedaes mentales de la Organización Mundial de la Salú.

Nun asocede lo mesmo cola Transexualidá, qu’a día de güei sigue tando incluyida como enfermedá mental nesa llista.
Dende la Organización de Muyeres de la Confederación Intersindical, queremos sofitar tolos actos entamaos polos colectivos de llesbianes, gais, transexuales y bisexuales de tol Estáu pa refugar la permanente discriminación y l’odiu secular qu’entá sufren estes persones; la constante vulneración de los sos derechos ciudadanos.
Dende la Organización de Muyeres de la Confederación Intersindical somos conscientes de la necesidá de siguir trabayando por erradicar un entornu fóbicu qu’estigmatiza y marxina a les persones pola manera de ser, deseyar y amar.
Reafitamos el nuesu compromisu, como organización sindical, de velar polos derechos de los y les trabayadores, tamién nesti ámbitu. Nun tenemos d’escaecer que la nuesa acción sindical realízase n’espacios sensibles (educación, alministraciones
públiques, sanidá,…) nos qu’entá queda enforma por facer y nos que les ideoloxíes y morales heterocéntriques y machistes marquen el día a día de los centros de trabayu, non yá no qu’a relaciones llaborales refierse, sinón tamién no qu’atañe al funcionamientu de les instituciones.
Reafitar esti compromisu implica empezar por nós mesmes, como organización, como colectivu humanu, qu’a priori nun ta llibre d’un llinguaxe y de unes actitúes que pueden cayer naquello que refugamos. Implica amás dir más allá del papel y realizar un exerciciu introspectivu d’analís, y nel so casu, d’autocrítica.
Supón tamién abrir el campu de moliciones intelectuales a otres reflexones, les venceyaes a otres teoríes y dinámiques que pueden treslladase al nuesu bagaxe ideolóxicu y a’l nuesu repertoriu d’acciones.
Esti compromisu cola llucha contra la homofobia, transfobia y bifobia ye un inmeyorable exemplu del cómo pueden enxareyase trabayu sindical y sociu-políticu. Ye una de les nueses señes d’identidá. Llenémosla de conteníu y deamos-y vida.
Por ello, la Organización de Muyeres de la Confederación Intersindical, dende’l compromisu cola defensa y estensión de los derechos humanos y ciudadanos, ratifica esti 17 de mayu la so tayante condena de la discriminación, persecución y criminalización de les persones lesbianes, gais, transexuales, bisexuales y intersexuales, lo mesmo que de les lleis qu’institucionalicen esa situación, en cualquier llugar del mundu, y comprométese a llevar esta condena a pié de cai, denunciando la homofobia, la transfobia y la bifobia presente nos distintos ámbitos de la sociedá na que vivimos.

17 de mayu del 2015

Organización de Muyeres de la Confederación Intersindical