Día Internacional contra la mutilación xenital femenina

Mutilación xenital

DÍA INTERNACIONAL CONTRA LA MUTILACIÓN XENITAL FEMENINA

Otru añu más, pa recorda-y al Mundu nel día 6 de febreru, qu’hai millones de neñes y muyeres que siguen sufriendo violencia nos sos derechos humanos, constituyendo una forma estrema de discriminación de la muyer, ensin razones médiques, -yos alterien parcial o totalmente los sos xenitales esternos, una de les razones: querer controlar la so sexualidá.

Según Naciones Xuníes (añu 2019) UNA DE CADA 20 NEÑES Y MUYERES SUFRIERON DALGUNA FORMA DE MUTILACIÓN XENITAL, eso significa 200 millones de neñes. La so práctica xeneralízase ente la infancia y los 15 años, lo que constitúi una tresgresión de los derechos de la neña. En munchos casos emplégase la fuerza pa llevar a cabu esta violación que supón peligru pa la salú, dolor y sufrimientos innecesarios, consecuencies físiques y psicolóxiques, eliminación y dañu a los texíos sanos y normales, y en dellos casos el fallecimientu. Too esto trai l’incumplimientu de los derechos a la salú, la seguridá y l’integridá física, el derechu a nun ser sometíu/a a tortures y tratos crueles, inhumanos o degradantes, y el derechu a la vida nos casos en que’l procedimientu acaba produciendo la muerte.

 N’África calcúlase que cada añu 3 millones de neñes y muyeres cuerren el riesgu de ser mutilaes. Esta práutica prautícase tamién en dellos países d’Asia, Oriente Mediu y, dalgo menos, en comunidaes d’inmigrantes n’Europa, Australia, Canadá, Australia, Nueva Zelanda y Estaos Xuníos.

 Más del 90% de les muyeres y les neñes de Guinea y Somalia sufren dalguna forma de mutilación o ablación xenital. 

El razonamientu de los países que practiquen esta violación de derechos, ente otros, ye qu’asina preparen a les neñes pa la vida adulta y el matrimoniu, el caltenimientu de la virxinidá y fidelidá nel matrimoniu y p’aumentar el placer sexual masculín.

Celebramos que se diera’l pasu en Sudán el 22 d’abril de 2020 d’aprobar una enmienda que convierte la mutilación xenital nun delitu sancionable (nesti país el 86,6% de muyeres  y neñes fueron sometíes a esta violación).

Nestos países tenemos d’esixir polítiques y lleis que protexan el derechu de les neñes y les muyeres a vivir ensin sufrir violencia nin discriminación. Hai qu’ellaborar planes pa desarraigonar esta práutica en tolos países que se realiza qu’incluyan servicios de salú sexual y reproductiva, asistencia social y xurídica y per aciu de la educación esaniciar estes práutiques nocives pa los derechos de les neñes y muyeres.

Estes muyeres callaes tienen nes voces de LA ORGANIZACIÓN DE MUYERES DE LA CONFEDERACIÓN INTERSINDICAL el berru pa dicir: ABOLICIÓN D’ESTA PRÁUTICA MALDADOSA QUE DISCRIMINA ENSIN LLENDE LOS DERECHOS  DE LES NEÑES, Y QUE FRAÑE LA DECLARACIÓN UNIVERSAL DE DERECHOS HUMANOS.