15 d’ochobre. Día Internacional de la Muyer Rural

El feminismu como pilastra fundamental para repoblar el mundu rural

Nesta xornada, dende la Organización de Muyeres de la Confederación Intersindical, queremos destacar el papel esencial de les muyeres nel ámbitu rural y l’impactu que’l feminismu puede tener na revitalización d’estos territorios. Les muyeres representamos una fuerza llaboral vital na agricultura, superando’l 40% en países desarrollaos y algamando hasta’l 50% en rexones d’África y Asia, según la ONU.

Sicasí, magar el nuesu llabor nel campu, les muyeres enfrentamos una fonda desigualdá na posesión de la tierra. En munchos llugares, nun cuntamos con derechos de propiedá que nos dexen asegurar la nuesa posición nel mediu rural,magar que somos les principales responsables de la producción d’alimentos. Esta situación llinda les nueses oportunidaes y asítianos nuna situación de vulnerabilidá.

Nel nuesu país, vivir nel mediu rural supón un desafíu constante. Atopamos na primer llinia de la protección medioambiental y na llucha por caltener la población nes nueses comunidaes. Ye necesario reconocer que’l llabor de les muyeres ye fundamental pa caltener y revitalizar el texíu social y económicu de la “España vaciada”.

Por ello, dende la nuesa organización esiximos a los poderes públicos y a les instituciones polítiques una intervención urxente y decisiva que ponga fin a esta desigualdá. Ye imperativu desenvolver una estratexa de repoblación qu’incorpore una perspectiva feminista, promoviendo la igualdá real y efectiva en tolos ámbitos de la vida rural. Creemos que, anque’l machismu ta presente tanto n’aries urbanes como rurales, nel mediu rural puede atopase la oportunidá de construyir una sociedá más xusta ya igualitaria, encimentada en valores de cooperación y respetu. Una sociedá na que la educación pública rural promueva la coeducación y la igualdá dende la infancia.

Esti procesu de repoblación nun tien de ser vistu como una amenaza, sinón como una oportunidá única pa desenvolver un modelu de sociedá innovador, sostenible y xustu. Sicasí, nun podemos llindanos a enfoques aisllaos n’educación y cultura. Ye necesario que los gobiernos de tolos niveles locales, autonómicos, nacionales y europeos— implementen polítiques de cohesión territorial qu’ameyoren les infraestructures y la conectividad nel mediu rural. La construcción d’autovíes, la estensión del tren d’alta velocidá y la proximidá a aeropuertos son elementos esenciales pa garantizar la conexón d’estes zones col restu del país.

Al par, ye urxente acabar coles zones de solombra” na cobertoria dixital. La conectividá, tanto física como dixital, ye clave pa garantizar la igualdá d’oportunidaes nel mundu rural. Asina, el feminismu conviérese nun motor imprescindible pa la revitalización d’estos territorios.

Tamién, dende un sindicatu como la Confederación Intersindical, nun podemos dexar d’esixir que se ponga fin a los retayos nos servicios públicos esenciales, tales como la dependencia, la sanidá y la educación. Estos retayos afecten fondamente a les zones rurales, que yá de por sí enfrenten llimitaciones nel accesu a estos servicios básicos. En munches ocasiones, da la impresión de que les alministraciones suponen que los retayos n’aries rurales tienen menos impactu, o que los derechos de les persones qu’ellí viven pueden ser ignoraos ensin consecuencies graves. Sicasí, la realidá ye bien distinta.

Cuando s’amenorga la inversión en servicios de dependencia, munches families en zones rurales pierden el sofitu necesariu pa curiar a los sos mayores o a persones con necesidaes especiales. Esto amonta la carga sobre les muyeres, quien, por cuenta de la falta de recursos, vense forzaes a asumir un rol de cuidadores en condiciones de gran sacrificiu y ensin apenes sofitu institucional. Lo mesmo asocede colos retayos en sanidá: cuando se cierren centros de salú, amenórguense les hores d’atención médica o se suprimen servicios, les persones que viven nel ámbitu rural tienen de percorrer llargues distancies p’aportar a tratamientos médicos básicos, lo que non solo ye un inconveniente, sinón un riesgu directu pal so bienestar y calidá de vida.

Tocantes a la educación, los retayos suponen menos recursos pa les escueles rurales, que supón un amenorgamientu del personal docente o inclusive cerrar centros. Esto pon en peligru’l derechu a una educación pública y de calidá pa les neñes y neños que viven nestes zones, llindando les sos oportunidaes y contribuyendo a la despoblación de los nuesos pueblos. Ensin una educación fayadiza, les nueves xeneraciones nun tienen un futuru garantizáu nos sos llugares d’orixe, lo que los emburria a buscar oportunidaes nes ciudaes y contribúi al círculu viciosu de despoblación y abandonu.

Los retayos en servicios públicos nes zones rurales son, n’última instancia, un actu de discriminación territorial qu’afecta de forma desproporcionada a quien yá viven nuna situación de desventaxa. Por ello, esiximos que les alministraciones asuman la so responsabilidá de protexer y fortalecer los servicios públicos en toles aries, asegurando igualdá de derechos pa quien escueyen vivir nel mediu rural y contribúin al caltenimientu de los nuesos pueblos, cultures y territorios. Les árees rurales merecen el mesmu nivel d’inversión y atención que les árees urbanes, y ye’l nuesu deber como sindicatu demandar qu’asina sía.

Nunca habrá una repoblación del mundu rural ensin una revolución.

Nunca habrá una revolución ensin el movimientu feminista.

Organización de Muyeres de la Confederación Intersindical