SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
11 D’OCHOBRE: DIA INTERNACIONAL DE LES NEÑES
El 11 d’ochobre ye’l Día Internacional de les neñes. La creación d’un día pa elles nel calendariu universal foi promovida, dende 2009, pola ONG Plan Internacional, al traviés de la so campaña internacional “Por ser neña”.
El 19 d’avientu de 2011, el Día Internacional de les neñes foi propuestu, por Canadá, como resolvimientu na Asamblea Xeneral de Naciones Xuníes por: “La necesidá d’invertir y sensibilizar a la sociedá sobre’l necesariu empoderamiento de les neñes coles mires de romper el ciclu de discriminación y violencia de les que son víctimes, y promover y protexer los sos derechos humanos”.
En munchos países, namá pol fechu de ser neñes, nun tienen derechu a la educación; son víctimes de trata o de mutilación xenital femenina, o son forzaes a casase a edaes tempranes. Situaciones onde les neñes sufren física, sexual, emocional, social y económicamente.
Falando en cifres, según datos de la ONU, 31 millones de neñes que tán n’edá de cursar estudios de primaria tán ensin escolarizar nel mundu. Calcúlase qu’unos 17 millones d’estes neñes nun van poder asistir a la escuela. Concretamente, esisten tres países nel mundu nos qu’ hai más d’un millón de neñes ensin escolarizar. En Nixeria son casi cinco millones y mediu; en Pakistán, más de tres millones, y n’Etiopía, más d’un millón.
Más de 30 millones de neñes cuerren el riesgu de sufrir la práctica de la mutilación xenital femenina nos próximos 10 años. 133 millones de neñes y muyeres yá la sufrieron nos 29 países d’África y Oriente Mediu onde avecen a aplicar esta nociva práctica.
Cada 2 segundos una neña ye obligada a casase. A escala mundial, según UNICEF, más de 700 millones de muyeres casáronse siendo neñes (con menos de 18 años d’edá). N’África, una de cada trés muyeres —unos 250 millones casaron antes de cumplir los 15 años. Davezu les neñes casaes nun pueden practicar un sexu seguro, lo cual failes vulnerables a les infecciones de tresmisión sexual y los embaranzos ensin deseyar. Los entueyos nel embaranzu o nel partu son la segunda causa de muerte de les neñes ente 15 y 19 años. Por eso, nesti día, damos tol nuesu sofitu a la campaña de UNICEF, #NiñasNoEsposas, porque les neñes merecen esfrutar de la so infancia.
Calcúlase que les neñes de menos de 16 años son víctimes de la metá de les agresiones sexuales. Cada 10 minutos, en dalgún llugar del mundu, una adolescente muerre como resultáu de la violencia. Nos llugares de conflictu, les adolescentes son especialmente vulnerables a la violencia sexual y, en dellos casos, grupos armaos secuéstrenles y esplótenles sexualmente. 120 millones de neñes son víctimes de trata, cada añu.
Dende la Secretaría de la Muyer de SUATEA soscribimos les palabres de la Directora Executiva de ONU Muyeres, Phumzile Mlambo-Ngcuka, que, na so declaración por cuenta d’esti día, señala: “Güei ye’l día en que centramos la nuesa atención na Neña, pero nun ye un día aislláu. Ye parte d’una campaña masiva ya implacable hacia un mundu igualitariu: Por un planeta 50-50 en 2030”.
Pa qu’esto sía posible, pidimos a los distintos Gobiernos y organismos institucionales que trabayen y doten de los recursos necesarios pa desaniciar tou tipu de violencia contra les neñes: la mutilación xenital femenina, el matrimoniu infantil, la trata, etc., y garanticen el so bientar, la so educación y los sos derechos, güei y siempres. ¡POLES NEÑES!
El secretariáu de SUATEA
Uviéu 11 d’ochobre de 2016
Esta entrada está disponible en: Castellano (Castellanu)
