11 d’ochobre: Día Internacional de les Neñes

El día 11 d’ochobre celébrase’l Día Internacional de les Neñes, instauráu pola Asamblea Xeneral de les Naciones Xuníes dende 2011 (Resolvimientu 66/170) coles mires de convidar a los países de la comunidá internacional a visualizar la situación na que viven les neñes y los retos a los que s’enfrenten, y tamién promover los sos derechos.
Esta fecha tien l’envís d’exhibir los problemes escepcionales a los que s’enfrenten tanto neñes como adolescentes, en temes como la discriminación y la violencia de xéneru, intentando tamién dar prioridá al aponderamientu de les menores y al cumplimientu de los sos derechos humanos.
La creación d’un día para les neñes nel calendariu universal foi promovida dende 2009 pola ONG Plan Internacional, cola campaña internacional “Por ser neña” y enfocada a acabar cola doble discriminación que sufren millones de neñes pola mor del so xéneru y la so edá, siendo ésti’l sector de la sociedá más discrimináu en tol mundu. Sufren discriminación n’educación, salú, trabayu y vida familiar y, en países en víes de desenvolvimientu onde hai escasez de recursos, les neñes son les más vulnerables.
El bienestar, los derechos humanos y el aponderamientu de los 1.100 millones de neñes del mundu son fundamentales para cumplir l’Axenda 2030 para’l Desenvolvimientu Sostenible. Tales oxetivos non pueden cumplise ensin un especial énfasis en llograr la igualdá de xéneru.
La práctica de la mutilación xenital femenina, frecuente nun gran númberu de países africanos y en dellos asiáticos, ye una práctica tradicional que supón una forma de violencia contra les neñes y una violación de los derechos humanos. Nun entiende de clases sociales nin de niveles educativos y suel provocar infecciones, infertilidá o inclusive la muerte. En tol mundo, más de 200 millones de neñes y muyeres sufrieron mutilación xenital. Ye un problema global que precisa una solución global.
Danse cada vez más casos de neñes afectaes pol matrimoniu infantil, violando los sos derechos, restrinxendo-yos la educación, estropiando la so salú y torgando-yos el progresu y les sos oportunidaes de futuru. Hasta la fecha, en tol mundu, lo que se meyoró na eliminación del matrimoniu infantil ye demasiao poco. Los datos de la UNESCO son apolmonantes: cada añu 15 millones de neñes cásense enantes de cumplir los 18 años.
Les consecuencies del matrimoniu infantil forzáu son físiques, psicolóxiques y emocionales, amás de sociales y económiques, pos tienen poques probabilidaes d’asistir a la escuela, son más vulnerables a sufrir violencia, abusos y relaciones sexuales forzaes.
Per otru llau, l’embaranzu precoz ye una de les causes y consecuencies más peligroses del matrimoniu infantil. Los entueyos del embaranzu y el partu son la principal causa de mortalidá de les neñes de 15 a 18 años nos países en desenvolvimientu. Si sigue l’actual enclín, 86 millones de neñes en tol mundu van sufrir dalgún tipu de mutilación xenital pa 2030 y en 2020 más de 140 millones de neñes van ser obligaes a casase.
La violencia infantil, en toles sos formes (acosu escolar, violencia familiar, esplotación infantil o violencia sexual) ye una de les violaciones de los derechos de la infancia más espardida. Casi la metá de les agresiones sexuales nel mundu cométense contra neñes menores de 16 años. Un claru referente mundial de violencia infantil son les neñes nixerianes secuestraes en 2014 por Boko Haram, usaes como trofeos de guerra, forzaes a ser esposes o sirvientes de los militares, dalgunes d’elles convertíes n’esclaves sexuales o neñes-bomba, y otres asesinaes por desobediencia.
La educación ye un derechu que, en munchos casos, nun se respeta, xeneralmente en entornos nos qu’hai probeza y escasez de recursos. Alredor de 63 millones de rapacines nun tienen accesu a la educación y una de cada trés nun llega a la educación secundaria. Les neñes teníen en 2015 más probabilidaes d’inscribise na escuela primaria que les de les xeneraciones anteriores. Sicasí, el matrimoniu infantil y la violencia físico y sexual son les principales torgues pa que les neñes lleguen a la secundaria y puean incorporase al mercáu llaboral pa salir del círculu de la probeza.
Según la UNESCO, l’apoderamientu de les neñes y les muyeres empieza nos bancos de la escuela. La igualdá de xéneru significa alfabetización, accesu a la ciencia y posibilidaes pa que les neñes algamen a ser tolo que quieran. Esto ye esencial pa los derechos humanos, pa la salú, pal desenvolvimientu sostenible, pal texíu de les sociedaes nel so conxuntu.
En momentos nos que dirixentes mundiales faen planes y presupuestos col envís de crear un mundu meyor, esiximos que s’invierta nes neñes, pos ye una estratexa pal ésitu. Esiste un venceyu directu ente’l progresu de les neñes y el progresu de toos nós. Por exemplu: un añu más na escuela secundaria puede aumentar los sos salarios ente un 15% y un 25%.
Dende la Organización de Muyeres de la Confederación Intersindical, denunciamos la frecuente violación de los derechos de les neñes y pidimos a los gobiernos y sociedaes qu’aumenten los esfuerzos pa erradicar esta triste realidá.
Nel Día Internacional de la Neña, con más fuerza tovía, sofitamos la llucha pa impulsar el progresu de les neñes en tol mundu ¡DEXEMOS QUE LES NEÑES SÍAN NEÑES!

Organización de Muyeres de la Confederación Intersindical
11 d’ochobre de 2017