21 de xunu – Día Internacional de la Educación Non Sexista

Esta entrada está disponible en: Castellano (Castellanu)

Cuando falamos d’educación non sexista referímonos a la consciencia fonda na práctica educativa d’una formación n’igualdá de xéneru y de derechos para toles persones, con independencia del so creu, edá, clase social, cultura, identidá de xéneru o orientación sexual, llingua y condición.

Una educación non sexista ufierta una riestra de beneficios tanto para los individuos como para la sociedá nel so conxuntu. Dalgunos d’estos beneficios inclúin:

Igualdá d’oportunidaes: al romper colos estereotipos de xéneru, ábrese’l camín pa que tolos neños y neñes puedan escorrer los sos intereses y metes ensin llimitaciones basaes nel so xéneru. Esto dexa que cada individuu tenga igualdá d’oportunidaes pa desenvolver el so potencial y algamar l’ésitu personal y profesional.

Construcción de relaciones saludables: la educación Non Sexista fomenta’l respetu mutuu, la empatía y la comunicación efectiva ente los xéneros. Al esaniciar los roles de xéneru restrictivos, promuévese la construcción de relaciones basaes na igualdá y l’entendimientu, lo que de la mesma contribúi a amenorgar la violencia de xéneru y promover la convivencia pacífica.

Mayor diversidá y creatividá: al dexar que tolos neños y neñes esploren los sos intereses y talentos ensin restricciones de xéneru, foméntase la diversidá y la creatividá en distintes árees como la ciencia, l’arte, la tecnoloxía y el deporte. Esto arriquez a la sociedá al aprovechar tol potencial humanu y romper coles barreres que llinden el desenvolvimientu individual y colectivu.

Prevención de la discriminación y estereotipos: la educación non sexista desafía los estereotipos y prexuicios de xéneru enraigonaos na sociedá. Al educar a los neños y neñes na igualdá, contribúi a prevenir la discriminación basada nel xéneru, amás d’esaniciar los estereotipos dañibles que perpetúen la desigualdá.

Empoderamientu y autoestima: al enseñar a los neños y neñes que son pervalibles y capaces ensin importar el so xéneru, fortalezse la so autoestima y promuévese’l so empoderamientu. Esto brínda-yos les ferramientes necesaries pa enfrentar los desafíos de la vida y lluchar pola igualdá na so redolada.

Pa llograr una Educación Non Sexista ye importante revisar les práctiques educatives, tanto nos contestos escolares, como fora d’ellos, pa favorecer a toos y a toles integrantes de les comunidaes educatives y de la sociedá.

Pa promover una Educación Non Sexista ye necesario:

  • Asegurar la igualdá d’accesu a la educación pa les muyeres de toles edaes.
  • Esaniciar l’analfabetismu, asegurando l’accesu universal de les neñes a la educación básica.
  • Aumentar l’accesu de les muyeres a la formación profesional y crear programes educativos pa muyeres desemplegaes.
  • Velar por que les instituciones educatives respeten los derechos de les muyeres y neñes.
  • Promover una educación non discriminatoria.
  • Ellaborar currículos y llibros didácticos llibres d’estereotipos y con llinguaxe incluyente pa tolos niveles d’enseñanza, incluyendo la formación de personal docente.

Ye importante destacar que la educación ye clave na formación d’una sociedá llibre de discriminación, violencia y estereotipos de xéneru; porque les instituciones educatives entá producen y reproducen desigualdaes de xéneru y estereotipos; y porque tenemos la responsabilidá, y la obligación, d’avanzar escontra una educación con perspectiva de xéneru, que fomente relaciones sanes ente muyeres y homes.

Secretaría de la Muyer de SUATEA 

Organización de Muyeres de la CI

Print Friendly, PDF & Email

Esta entrada está disponible en: Castellano (Castellanu)