Ye menester valorar los títulos d’asturianu

Esta entrada está disponible en: Castellano (Castellanu)

Publicóse nel BOPA del pasáu mes de febreru la convocatoria de pruebes de certificación nel Marcu Européu de les Llingües de la competencia llingüística n’asturianu de los niveles B2 y C1 que se van celebrar na seronda d’esti añu 2021. L’añu pasáu yá se realizaron les correspondientes al nivel B2 y son munches les persones qu’anguaño tienen la certificación d’esti nivel, ente elles munchu profesoráu. 

El profesoráu  cola certificación B2 n’asturianu presentó énte la Conseyería d’Educación solicitú d’inclusión d’esta nueva titulación nel rexistru  personal de formación permanente que tien la Conseyería pa cada docente. Incluyir les nueves titulaciones nesti rexistru tien importantes efectos alministrativos: reconocimientu de méritos pa oposiciones, concursu de tresllaos y complementu salarial de formación permanente. Pero, ablucaron los/les soslicitantes al contestar la Conseyería desestimando la so pitición por carecer de la documentación requerida pola normativa vixente, a saber, un títulu oficial de les Escueles Oficiales d’Idiomes o un resguardu d’elli. 

Ye la Conseyería d’Educación la que convoca, ellabora, alministra, evalúa y certifica estes pruebes de competencia llingüística sometíes a la normativa europea, pero paradóxicamente los sos certificaos conviértense en papel moyao al nun poder  valoralos en condiciones d’igualdá coles certificaciones d’otres llingües del Marcu Européu. Ello rescampla’l despreciu manteníu nel tiempu col que trata l’ Alministración asturiana al interés, la ilusión y el compromisu de munches persones asturianes, tamién del profesoráu, cola llingua asturiana. Ye más, vulnera los derechos llingüísticos fundamentales recoyíos na nuestra llexislación, nos trataos internacionales y específicamente les recomendaciones de la Carta Europea de les Llingües Minoritaries. Demuestra tamién la falta de procuru y dilixencia de l’Alministración a la hora de procurar seguridá xurídica a les sos actuaciones: nun ye de recibu crear títulos ensin cobertura reglamentaria que garantice la so valoración. 

Daqué paecío asocede colos títulos d’Espertu y Especialista en llingua asturiana otorgaos pola  Universidá d’Uviéu. Son dos títulos que pola so duración equivaldríen a los actuales títulos de máster y que tampoco son reconocíos con esti nivel. 

Poro, dende SUATEA esiximos a l’Alministración asturiana: 

  • La cobertura normativa afayadiza pa que los títulos de Llingua asturiana daos por ella (Conseyería Educación y Universidá d’Uviéu) seyan valoraos en condiciones d’igualdá colos de les otres llingües. 
  • Creación de la especialidá de Llingua Asturiana y Gallego-Asturianu. 
  • Enseñanza de Llingua Asturiana y Gallego-Asturianu en tolos niveles educativos (Escueles Oficiales d’Idiomes tamién).  

El Secretariáu de SUATEA
N’Uviéu a 9 d’abril de 2021

Print Friendly, PDF & Email

Esta entrada está disponible en: Castellano (Castellanu)