Home > Comunicaos > Ye illegal encadenar contratos temporales

Ye illegal encadenar contratos temporales

La Unión Europea declara illegal encadenar contratos temporales p’atender necesidaes permanentes.

SUATEA va entamar una campaña a nivel estatal y asturianu p’acabar cola situación d’inestabilidá ente’l profesoráu.

Ésti ye’l veredictu que, en sentencia emitida’l 14 de setiembre pol Tribunal de Xusticia de la Unión Europea depués d’una denuncia interpuesta por una funcionaria interina del serviciu de salú de la Comunidá de Madrid, declara que les alministraciones públiques del Estáu Español tán cometiendo un fraude de llei al encadenar contratos temporales cuando éstos deberíen de ser fixos. Los efectos, que yá taben reconocíos pal personal llaboral, tienen d’estendese agora al personal funcionario interino de cualquier Alministración Pública, como la Sanidá, la Educación o la Xusticia.

El Tribunal entiende que “no podrá tratarse a los trabajadores con un contrato de duración determinada de una manera menos favorable que a los trabajadores fijos comparables por el mero hecho de tener un contrato de duración determinada” y “que los nombramientos de duración determinada no pueden renovarse para desempeñar funciones permanentes y estables incluidas en la actividad normal del personal estatutario fijo”. Amás, denuncia que l’Alministración Pública del Estáu Español nun tien lexislación que lu obligue a crear puestos estructurales, lo que lu dexa abusar de la ufierta repitida pa la so cobertoria de places en réxime d’interinidá, colo que la situación de precariedá de los/les el trabayadores conviértese en permanente.

Dende SUATEA llevamos  años espresando la nuesa esmolición pola creciente precariedá ya inestabilidá de les plantiyes docentes nel nuesu  país. Más de 100.000 profesores sufren cada añu’l despreciu de l’Alministración y vense obligaos a camudar de puestu de trabayu cuando les necesidaes qu’atienden son permanentes. L’alumnáu y la comunidá educativa polo xeneral sufren esta falta d’estabilidá que se traduz inclusive en qu’hai centros que camuden a tol so profesoráu d’un cursu pa otru y qu’al entamu del mesmu nun tienen nin siquier equipu directivu.  La situación ye insostenible sobremanera en Comunidaes como l’asturiana onde les tases d’interinidá tán en redol al 30% y esiste un Alcuerdu de profesoráu interín suscritu pola Alministración, ANPE y UXT  nel que la so base ye la rotación nel empléu, daqué qu’acaba de ser declarao contrario a derechu de la Unión Europea.

Por ello, dende’l Secretariáu de SUATEA vamos proponer a la Confederación de STEs Intersindical, el desenvolvimientu d’una campaña pa esixir al Gobiernu en funciones del Partíu Popular qu’adopte con calter inmediatu midíes qu’acaben con esta aberrante situación nel mundu de la enseñanza pública, pa encamentar a los grupos políticos a que pongan en marcha inicitives lexislatives pa entamar una solución xusta y digna pal profesoráu interina y pa esixir la inmediata convocatoria de la Mesa Sectorial d’Educación onde s’encete la transposición de la xurisprudencia europea pa llograr l’allampada estabilidá d’esti colectivu.

SUATEA va llevar estes mesmes propuestes ante toles instancies nel ámbitu asturianu pa que la precariedá y la inestabilidá llaboral s’acaben. El Parlamentu asturianu yá se manifestó pa que se abra una negociación sobre Profesoráu Intererino. La sentencia de los tribunales Europeos supón un nuevu barganazu a les Alministraciones que como l’asturiana siguen encerriscaes en promover la rotación nel empléu y la inestabilidá llaboral.

 

 

 

 

Secretariáu de SUATEA STEs-intersindical

19 de septiembre de 2016

Esta entrada tamién se puede consultar en: Castellanu