Home > Comunicaos > Xunu, mes de los colores y la diversidá

Xunu, mes de los colores y la diversidá

28 de xunu 2018 // Xunu, mes de los colores y la diversidá

Nes últimes décades, el mes de xunu convirtióse pa la comunidá LGTBI+ nuna fecha de movilización y reivindicación a escala planetaria. Esto ye válido pa dellos países nos que se caltienen lexislaciones represives y, tamién, pa los territorios nos que se consiguieron meyores no que cinca a poner fin a les discriminaciones. Nos primeros, la celebración del Arguyu conviértese nuna xornada de llucha que, en munches ocasiones, acaba con cargues policiales, agresiones de grupos fascistes o detenciones. En tolos casos, la fecha convirtióse nun exerciciu de visibilidá que dexa l’afirmación social de la población LGTBI+
Convien recordar que la fecha’l 28  xunu, como día del Arguyu, conmemora l’entamu d’una revuelta asocedida en Nueva York nuna redada policial nel pub Stonewell, cuando la xente decidió enfrentase a la represión entamando una serie de disturbios nes calles que se prologaron los díes socesivos. Aquella llucha convirtióse nel entamu d’una movilización llueu conocida como’l Día del Arguyu que plantegaba como exa de la movilización lo que llegó a conocese como Lliberación Gay.
Cuarenta y nueve años dempués, siguimos saliendo a les cais, ufiertando una muestra de visibilidá colectiva que mos dexa afirmanos énte una sociedá que, mediu sieglu dempués, sigue furrulando con patrones y esquemes mentales de calter machista y heterosexista.
Anque son munchos los llogros algamaos, tovía tamos bien lloñe de consiguir la plena normalización social de la realidá LGTBI+. La política de facenos visibles y lluchar polos nuesos derechos sirvió pa qu’ en dellos estaos esistan lexislaciones que reconocen los nuesos afeutos como modelu familiar, qu’entienden que los nuesos derechos formen parte de los Derechos Humanos y que los discursos homófobos  namás sirven p’arruinar vides. Diverses organizaciones internacionales asumen les nueses reivindicaciones anque eso nun significa que desapaeciera la represión que sigue afectando a la población LGTBI+ en numberosos países del mundu.
Sicasí, la homofobia d’estáu caltiense vixente en numberosos territorios. Convién recordar que siguen esistiendo países nos que s’aplica la pena muerte por práctiques fuera lo heteronormativo; otros nos que se prohibe cualquier tipu de referencia que faiga mención a la homosexualidá como ye’l casu de Rusia; n’otros munchos, cométense crímenes d’odiu que tienen el so orixe nel refugu a la orientación sexual o identidá de xéneru, de la que se caltienen disposiciones llegales y práctiques sociales discriminatories y escluyentes qu’afecten a la comunidá LGTBI+.
Dende la Confederación Intersindical (na que s’integra SUATEA) somos conscientes de la importancia que supón la visibilidá del colectivu LGTBI+ na midida na que facilita la reconocencia social y dexa que quien formen parte d’esti grupu puean atopar a los sos iguales de la que refuercen l’autoestima d’eses persones. Sicasí, quixéremos señalar tamién que la gran mayoría de les persones LGTBI+ formen parte d’un modelu social en crisis y por ello tamién sufren les sos consecuencies: dificultaes p’aportar a puestos de trabayu, paru masivu qu’afecta especialmente al colectivu transexual, problemes p’algamar la emancipación familiar, son dalgunes de les dificultaes a les que tienen facer frente, que son les qu’afecten a los sectores populares de la nuesa sociedá.
La Confederación Intersindical quier sumase a les distintes actividaes que’l movimientu social LGTBI+ tien programaes en distintes localidaes y comunidaes autónomes. Queremos reafirmar el nuesu compromisu d’acompañamientu en toles lluches empuestes a la reconocencia de los derechos, especialmente los plantegaos pol colectivu transexual. Igualmente creemos na necesidá d’abrir espacios que trabayen la prevención de les agresiones y acosu a la comunidá LGTBI+ especialmente nel ámbitu de la educación. Ye una xera urxente incrementar el trabayu que tenga como oxetivu la formación de los nuesos menores pa evitar les práctiques d’acosu y familiarizalos con valores como’l respetu a la diferencia y la igualdá.

En Madrid, a 49 años de la revuelta de Stonewall.
28 de xunu 2018

Esta entrada tamién se puede consultar en: Castellanu