Home > Comunicaos > Xunta sobre homologación salarial col Grupu Parlamentariu Socialista

Xunta sobre homologación salarial col Grupu Parlamentariu Socialista

Nel día de güei, 2 de xineru, una delegación de SUATEA y de la Federación d’Enseñanza de Comisiones Obreres, aconceyemos con Dolores Carcedo y Ricardo Suárez Argüelles  del grupu parlamentariu socialista na Xunta Xeneral. 

L’oxetu de la xunta foi siguir la ronda de contactos políticos ya institucionales pa esplicar la nuesa propuesta d’homologación salarial pal profesoráu asturiano.

Nesta xunta, ficimos un intercambiu d’opiniones sobre’l modelu retributivu esistente agora que xenera una filera d’agravios y discriminaciones en comparanza colo esistente n’otres comunidaes autónomes. Pa SUATEA, la situación actual qu’asitia al profesoráu nos últimos llugares nel cuadru comparativu, ye la resultancia de l’aplicación d’un modelu anómalu, la Evaluación Docente, vixente dende fai más de diez años.

Esti sistema, únicu a nivel d’estáu, xeneró una división ente’l profesoráu  de la qu’abrió les puertes pa l’aplicación de modelos neolliberales ente’l personal docente puesto que condiciona la retribución final a l’adhesión a un Plan d’Evaluación que nun ameyora en nada la calidá de la función docente.

Planteguemos el procesu de segmentación salarial que padez el profesoráu asturiano y el riesgu de que s’afonde nesa llínia en casu de siguir col modelu vixente na actualidá. Frente a ello, defendimos la propuesta d’abrir una vía hacia la homologación salarial, basada na creación d’un complementu autonómicu al igual que los esistentes nel restu de los territorios. Esti modelu supondría una xubida llinial, igual pa tolos cuerpos, qu’afeutaría al conxuntu de plantiya docente en vez de proceder a la creación d’un nuevu plan que solo afectaría a una parte del profesoráu, al quedar escluyíu del mesmu’l sector que nun cumpla colos años (cinco pal primer plan y colos diez pal segundu) d’antigüedá mínima esixida.

Tamién, a lo llargo la entrevista s’encetaron otres cuestiones, ente les que destaca l’amenorgamientu horariu pal profesoráu con más de 55 años y el necesariu amenorgamientu llectivu pal profesoráu de Primaria ya Infantil, aspeutos que SUATEA reclamó apocayá en comparecencia na Xunta Xeneral na comisión de Facienda de cara a los presupuestos pal añu que s’empecipia.

Con esta entrevista, siguimos trabayando pa facer visible la esistencia de modelos alternativos que dexen ameyorar les condiciones salariales del personal docente a la vez que denunciamos la situación na que mos atopamos, que ye la resultancia del camín pol que nos llevaron los sindicatos ANPE y UGT.

Tanto l’Alministración como’l partíu que la sofita, el PSOE, coinciden n’escuchar les nueses demandes y propuestes ya’l so compromisu d’estudiales, de la que nos señalen les dificultaes económiques esistentes pa intentar xustificar la situación actual.

Dende SUATEA queremos manifestar, otra vegada más, el nuesu refugu al modelu d’evaluación y aportunar en que la solución pasa por un procesu d’homologación que permita acabar cola discriminación que sufre’l personal docente y llamamos al profesoráu a movilizase pa reclamar dalgo que mos correspuende por derechu.

                                                                          Uviéu/ Uviéu 2  de xineru 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344