COMUNICAU: Xunta d’entamu de cursu JPD y la Conseyería d’Educación.

Na mañana de güei, 30 d’agostu de 2021, la Conseyera d’Educación Trepa Escayu y les persones al mandu de les Direcciones Xenerales caltuvieron xuna xunta coles organizaciones sindicales de la Xunta de Personal Docente non universitariu pa presentar al nuevu equipu ya informar personalmente de les midíes de seguridá alcordaes tres la xunta intersectorial caltenida col Ministeriu, lo mesmo que de les incidencies detectaes tres el so recién toma de posesión.

Aprovechando la promesa d’apertura al diálogu colos sindicatos, y la mano tendida p’ameyorar la calidá del sistema educativu, SUATEA pidió al nuevu equipu al mandu de la Conseyería la inmediata negociación de dalgunos de los alcuerdos de la Xunta de Personal Docente que lleven años siendo ignoraos pola Alministración y que, ente otros, consideramos urxentes; a saber:

• 23 hores lectives en Primaria ya Infantil.
• Amenorgamientu de xornada llaboral pal profesoráu mayor de 55 años ensin amenorga retributiva.
• Amenorgamientu de les ratios máximes d’alumnáu.
• Permisu por asuntos particulares retribuidos (moscosos).
• Decretu d’Atención a la Diversidá.

Otra esixencia repitida ye la meyora de la planificación de les actuaciones d’entamu y final de cursu. Ye necesariu entainar los trámites y antemanar les convocatories d’aspirantes a interinidá ufiertando, amás, toles vacantes de tolos cuerpos na primer convocatoria.
Tres les temes comunes, SUATEA plantegó dos cuestiones graves que tienen de resolvese con urxencia, esto ye antes del 1 de setiembre:

1. Iguar l’ausencia total de puestos nos Conservatorios y Escueles profesionales de Música na primer ufierta del 24 d’agostu, como yá asocediera’l cursu pasáu, por aciu la prórroga de contratu pal profesoráu del Cuerpu de Música y Artes Escéniques.
2. La inclusión nes llistes d’aspirantes a interinidá del profesoráu técnicu de la especialidá d’Instalaciones Electrotécnicas, que foi espulsáu de la convocatoria a pesar de cumplir tolos requisitos esixíos pal accesu nel últimu procedimientu selectivu y los mesmos del Alcuerdu d’interinidá. Trabayadores qu’a pesar de los sos más de 30 años d’esperiencia docente van ser puestos na cai’l 1 de setiembre, porque esta Conseyería, a diferencia d’otres como la de Cantabria o Castiella y Llión, asina lo decidió. Esti casu ta siendo estudiáu polos servicios xurídicos según comentó’l Director Xeneral de Personal Docente.

Esperamos qu’esti nuevu equipu caltenga la disposición d’apertura a la negociación colectiva demostrada güei y qu’informe convenientemente a les organizaciones sindicales y al colectivu docente, especialmente nos momentos críticos rellacionaos coles ufiertes d’empléu públicu y coles instrucciones y protocolos de seguridá.

El secretariáu de SUATEA
Uviéu, 30 d’agostu de 2021