Home > Comunicaos > Xunta de la Mesa de Negociación del MEC

Xunta de la Mesa de Negociación del MEC

AXÚNTASE LA MESA DE NEGOCIACIÓN DEL MINISTERIU D’EDUCACIÓN

Na mañana de güei, 20 de marzu, celebróse una xunta telemática col Ministeriu d’Educación pa tratar la situación xenerada nel ámbitu educativu pola pandemia del COVID-19 y el cambéu del Real Decretu 276/2007 d’ingresu a la función pública docente para prorrogar les ufiertes públiques d’empléu.

Per parte del Ministeriu d’Educación, asistió’l Subsecretariu d’Educación, José Carmelo Onteniente, qu’esplicó que la situación xenerada pola pandemia del COVID-19 “obliga a estremar los precuros y dexar d’asistir a los centros educativos”. Sobre esi puntu, los representantes de la Confederación de STES y del restu de sindicatos aportunaron na necesidá que se decrete’l zarru de los centros educativos naquellos territorios qu’entá nun lo decretaron, como Castila La Mancha o’l País Valencià, pos poniéndose en riesgu a les persones que, munches o poques, tienen que se mover p’abrir los centros cuando puen realizar el so trabayu perfeutamente dende les sos cases. El Subsecretariu contestó que recueye la propuesta de los sindicatos, pero tamién manifestó que respeten l’autonomía de los territorios, colos qu’hai que se coordinar.

Al respective’l segundu puntu del orde del día, que’l Ministeriu nomó “Estáu de situación de la estabilización del empléu temporal”, en realidá tratábase d’una propuesta de cambéu del Real Decretu 276/2007 y, en concretu, de la disposición transitoria tercera introducida pol RD 84/2018 que tamién modifica’l RD 276/2007 pa dar cabida al Alcuerdu robláu pol Ministru Montoro y CCOO, UGT y CSIF en 2017, que dexa la convocatoria d’oposiciones masives na que mos atopamos nestos momentos. El cambéu a cencielles consiste n’añedir les ufiertes públiques d’empléu que se tán produciendo en 2020 pa poder respetar l’alcuerdu de 2017.

Los representantes de la Confederación de STEs-i manifestaron en primer llugar que la sentencia del Tribunal de Xusticia de la Unión Europea (TJUE), conocida ayeri mesmo, camuda les riegles del xuegu, yá que reconoz esplícitamente que les oposiciones tal como tán concebíes anguaño nun son la sanción esperable p’acabar col fraude de llei nel cual s’atopen los miles de persones interines nel conxuntu de la función pública y, tamién, nel ámbitu educativu. Amás, STES manifestó la so deceición énte la propuesta del Ministeriu porque nin siquier aprovecharon esti cambéu del RD 276/2007 pa introducir, a lo menos, que les pruebes de les oposiciones nun sían eliminatories, a lo cual el PSOE se comprometió con tolos sindicatos en 2017, cuando tovía taba na oposición. Sobre esi tema, el Ministeriu nin se pronunció.

De siguío, los STES espliccaron que, como yá ye sobradamente conocío, nun comparten l’actual modelu de concursu oposición y más dempués de la sentencia d’ayeri, que vuelve reconocer l’abusu de la contratación temporal per parte de les Alministraciones, fechu que ye contrariu a llei. Y propunxo que ye’l momentu de camudar el marcu llegal p’aportar a la función pública docente y convertilo na sanción” qu’aliega’l TJUE, que pa los STES pasa por regular l’accesu diferenciáu (que les places ocupaes por docentes interinos s’ufierten a esti personal y les places de nueva creación, xubilaciones, etc., a les persones que lexítimamente quieren optar dende fuera del sistema educativu. Y tamién que s’aplique l’artículu 61.6 del TREBEP pa consolidar el personal interino per aciu un procedimientu selectivu por concursu de méritos, que namá rique d’una llei per parte del gobiernu del estáu que lo ampare.

La rempuesta del Ministeriu a esti tema tamién foi deceicionante, porque afirmaron categóricamente que nun s’aplicará l’artículu 61.6 del TREBEP, anque coinciden en qu’hai que camudar el modelu actual d’ingresu a la función pública docente, suponemos que p’aplicar el famosu MIR educativu, anque na xunta nun se concretó esti estremu. Igualmente, el Subsecretariu afirmó que va haber oposiciones en 2020 porque la pandemia del coronavirus nun va ser eterna, pero nun concretó feches pa la realización de les pruebes. Sía que non, anque’l Subsecretariu nun lo confirmó, por noticies ensin confirmar que recibimos, paez probable que la próxima selmana se celebre una conferencia sectorial na que van participar les distintes Conseyeríes y el Ministeriu p’alcordar, ente otres coses, l’aplazamientu de les oposiciones.

SUATEA y la Confederación de STES nun acaben d’entender la prepotencia de l’Alministración, que miró bien de perfil la sentencia d’ayeri del TJUE y que, dende’l nuesu puntu de vista, tendría de plantegar una reflexón fonda sobre la situación de miles de docentes interinos que precisen una solución que, ensin dulda, l’actual modelu d’oposiciones nun ufierta y evitar asina una xudicialización innecesaria que de xuru se va producir si les actuales oposiciones masives dexen xente na cai, como yá ta pasando en dellos territorios.

Uviéu 20 de marzu de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344