Home > Comunicaos > Xunta de la conseyera coles Organizaciones sindicales

Xunta de la conseyera coles Organizaciones sindicales

XUNTA DE LA CONSEYERA COLES ORGANIZACIONES SINDICALES

Na mañana de güei, 4 d’ochobre, celebróse una xunta coles organizaciones sindicales na que la nueva conseyera, Carmen Suárez, presentó al so equipu y presentónos dellos aspeutos del so plan d’actuación pa esta llexislatura:

  •    Cambéu de la estructura de la Conseyería. Caltienen les Direcciones Xenerales y creen el serviciu 0-3 y el Serviciu d’Equidá.
  •   Nel ámbitu rural van realizar un estudiu de necesidaes y van buscar fórmules pa dotar d’estabilidá de plantiyes nos centros rurales.
  • Van poner procuru n’amenorgar los índices d’abandonu escolar, buscando fórmules que-yos dexen desaniciar dificultaes al traviés d’itinerarios o formación básica que-yos dexe llograr titulación y competencia profesional.
  • Plan de Formación del profesoráu en xestión d’aula, convivencia, meyores n’innovación, Coeducación, trabayu cooperativu, etc.
  • Van buscar la forma d’amenorgar la tasa d’interinidá del 30% al 8%. Anguaño la Ufierta d’Empléu va ser de 506 places (392 de la tasa de reposición y 114 de la tasa d’estabilización).
  •     Van procurar ameyorar el sistema informáticu de pidimientos y axudicaciones.
  • Van entamar la negociación del segundu Plan d’Evaluación.

Dende SUATEA, valoremos positivamente la creación de los servicios d’Etapa 0-3 y el de Equidá. Echemos en falta dalguna referencia a la homologación salarial col restu de CCAA.

Amás, presentemos valoraciones d’entamu de cursu según temes pendientes y propuestes:

             Problemes d’entamu de cursu.

  • Tresllademos les dificultaes que tuvimos los sindicatos pa resolver los problemes que nos surdieron, al faltar interlocutores con quien resolvelos na conseyería. Too ello debese a que, anque la conseyera foi nomada en xunetu, hebo un importante retrasu en formar equipu, de fechu presentóse güei mesmo. 
  • Les instrucciones d’entamu de cursu nun reflexen prácticamente nenguna de les propuestes de la Xunta de Personal Docente del cursu pasáu: guardies del profesoráu, redes en Secundaria, sofitu educativu al alumnáu NEAE en FP y creación de servicios d’orientación nos CIFP, sofitos al profesoráu d’AL, regulación d’actividaes complementaries y extraescolares, etc.
  • Hebo problemes cola dotación de places al profesoráu interín del Cuerpu de Maestros cuando coincidíen dos o más places con códigu distintu n’un mesmu centru. Al nun tener datos del tipu de plaza o sustitución, diéronse casos inxustos en que s’axudicó sustituciones más curties a quien taba en meyor situación na llista.
  • Axudicaciones al colectivu de persones con diversidá funcional. La Conseyería nun tuvo en cuenta les sentencies qu’obliguen a camudar la forma d’axudicación.
  • Llistes de profesoráu interín actualizada. Dende’l cursu 2016/17 namás se van espublizando les llistes resultantes de los procesos selectivos, pero nun se depuren nin actualicen les anteriores.   
  • Medies xornaes. Denunciemos la evidente medría de les medies xornaes, especialmente en delles materies: Llingua asturiana, Música, Cultura clásica, etc.
  • L’aplicación del Alcuerdu d’amenorgamientu de la xornada lectiva del profesoráu de Secundaria: en munchos centros les plantiyes son bien xustes y hai munchos compañeros y compañeres que cierren horarios a más de 18 hores.

Temes pendientes y propuestes:

  • 23 hores lectives nel Cuerpu de Maestros. El cursu pasáu hebo compromisu d’encetar l’amenorgamientu pal cuerpu de maestros nesti cursu y va ser una prioridá pa esti cursu.
  • Amenorgamientu de xornada lectiva pa mayores de 55 años ensin amenorgamientu d’haberes. Ye un derechu que recueye a PONDERAR y contémplase en munches CCAA: Andalucía, La Rioxa, Ceuta y Melilla, Madrid, Navarra, País Vascu, Baleares, Cataluña (ensin amenorgamientu d’haberes); Rexón de Murcia y Castiella La Mancha, con amenorgamientu de haberes. Nun entendemos esti agraviu comparativu col profesoráu d’otres CCAA.
  • Alcuerdu d’interinidá. Planteguemos que l’Alcuerdu a vixente lleva yá cinco años, que ye francamente meyorable en munchos aspeutos, que provoca inestabilidá y rotación nel empléu y supón un agraviu comparativu col profesoráu interín d’otres CCAA. 
  • Llingua Asturiana: pa entamar, demandemos cumplir cola Llei d’Usu y dotar de profesoráu de llingua asturiana a tolos niveles educativos, incluyío Educación Infantil.

Amás, planteguemos que la conseyería encamiente al gobiernu central a que se creen les especialidaes de Llingua asturiana y Gallego-asturianu.

Per otra parte, preguntemos cuándo planteguen convocase les pruebes d’acreditación de nivel de competencia llingüística en Llingua asturiana y gallego-asturianu conforme al Marcu européu de les Llingües.

A lo último, planteguemos que pa l’acreditación tienen de regular la convalidación de los títulos propios de la Universidá d’Uviéu que capaciten pa impartir docencia y computalos pal baremu d’oposiciones y de llistes d’interinidá.

  • Conveniu cola Universidá Padre Ossó.   El conseyeru saliente robló un conveniu de formación del profesoráu con una entidá relixosa que dende SUATEA denunciemos nel so momentu. Pidimos información concreta sobre les actuaciones qu’implica’l conveniu y, a mayores, que s’anule o se dexe ensin efectu.
  • Campaña integrista de l’Asociación HazteOír. Pidimos que la conseyería dea instrucciones a los centros pa que se retiren de manera urxente los panfletos qu’esta asociación unvió a tolos centros educativos públicos incitando al odiu y semando la inseguridá y el mieu.
  • Demandemos un Plan Integral d’Igualdá pa los centros educativos públicos, obligatoriu y xeneralizáu en cumplimientu de les lleis vixentes.

Uviéu a 4 d’ochobre de 2019

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344