Home > Profesoráu > Xunta cola Conseyería d’Educación 21/04/20

Xunta cola Conseyería d’Educación 21/04/20

Na mañana de güei, 21 d’abril de 2020, celebróse xunta informativa por videoconferencia ente la Conseyería (Dirección Xeneral de Personal Docente y Dirección Xeneral d’Ordenación Académica) y les Organizaciones Sindicales de la Xunta de Personal Docente.

Como yá se nos anunciara, la Conseyería tien previsto publicar lo más aína una Resolución sobre evaluación final y estraordinaria pa les enseñances de los niveles Infantil, Primaria, ESO y Bachilleratu y sobre’l borrador d’ello informó a les OOSS de la Xunta de Personal Docente.  Consideren necesario dictar estes instrucciones pa dotar d’un marcu xurídicu a les acciones relatives a encarar el final de cursu tocantes a procedimientos alministrativos y evaluación de los aprendizaxes del alumnáu.

En relación al borrador que se nos presentó, per parte de SUATEA fixéronse delles aportaciones qu’aseguraron diben teneles en cuenta.

No que cinca a la evaluación d’otru tipu d’enseñances (FP, EOI, Artístiques…), esplicaron que decidieron que van facelo más palantre porque tán a la espera de que se publique una norma de calter estatal.

A pesar de qu’esti yera l’únicu puntu del orde del día, per parte de SUATEA, aportunamos nos siguientes aspeutos que consideramos urxentes:

–             Activar les convocatories selmanales de profesoráu interino pa sustituyir les baxes y xubilaciones del profesoráu. Espunxímos-yos les faltes de sustituciones que recibimos nel sindicatu y refartámos-yos la inacción d’esta Conseyería frente a otres CCAA que yá reactivaron les sustituciones. Pa que pueda producise una fayadiza evaluación del alumnáu, ye menester que se cubran yá les sustituciones de personal docente que se tán solicitando dende los centros. La respuesta foi que tán estudiando cómo facelo.

–             Anque mos consta que na mayoría los centros, a pesar de tener que tomar decisiones abondo sobre la marcha nesta situación inédita, los equipos directivos tuvieron que trabayar a estaya en condiciones precaries y que supunxeron un sofitu pal profesoráu, na xunta de güei, encamentémos-yos a que tomen midíes y corrixan los casos de extralimitación d’atribuciones de los equipos directivos en dellos centros. Recibimos quexes de profesoráu nel sentíu de que dellos equipos directivos, sofitándose na autonomía de los centros, tán frayando la llibertá de cátedra y l’autonomía pedagóxica del profesoráu, demandando que l’equipu directivu sía incluyíu en xuntes de departamentos, imponiendo los conteníos y xeres a realizar  y los plazos de corrección de les mesmes y esixendo actividaes que tán fuera de los criterios d’evaluación planiaos per cada departamentu, etc.

Tamién reclamemos que se revisen les esixencies burocrátiques de l’Alministración y de dellos centros porque, xunío a la carga pola atención diaria al alumnáu, xenera descontrol horariu y estrés pal profesoráu.

L’Alministración asegurónos qu’hai que respetar la llibertá de cátedra y que tomaríen les midíes pertinentes nos casos en que tuviera llugar esos escesos.

Per otra parte, solicitóse tamién la convocatoria de la Mesa Sectorial d’Educación pos, desque se declaró l’estáu d’alarma, ye una evidencia que camudaron les condiciones llaborales del profesoráu y ye una de les competencies de dicha Mesa de negociación.  Llamentamos qu’esti fechu, que ye conocíu pola Conseyería, nun ameritara nenguna reacción pela so parte, nel sentíu de protexer los derechos llaborales adquiríos pol profesoráu. Asina lo diximos y volveremos facelo na Mesa Sectorial qu’esperamos que sía convocada pronto.     

Uviéu, 21 d’abril de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344