Home > Centros educativos > ¿Xubilaos docentes pa cubrir les necesidaes educatives?

¿Xubilaos docentes pa cubrir les necesidaes educatives?

Siguiendo la llínea a la que nos tien avezaos el nuesu Conseyeru d’Educación, los representantes de los trabayadores enterámonos polos medios de comunicación de les iniciatives que van tomase nesta conseyería al respective de cuestiones qu’afecten al personal y al funcionamientu de los centros educativos. Nesta ocasión sospriéndesenos con una iniciativa respecto al profesoráu xubiláu y la so collaboración voluntario y gratuito en xeres non docentes nos centros educativos. En SUATEA allegrámonos que dende l’Alministración se considere un valor la esperiencia, el talentu y el potencial de les y los docentes asturianos; esperamos que se tengan en cuenta tamién estes cuestiones pa los interinos y interines que lleven munchos años desempeñando estes funciones, defendiendo la so estabilidá llaboral  y aprovechando la so esperiencia docente a lo llargo del tiempu n’ares de caltener la calidá educativa.

Nun nos allegra tantu, sicasí, qu’énte les repitíes demandes unánimes la Xunta de Personal del amenorgamientu de los periodos llectivos y la necesidá de contratación de personal pa facer tarees burocrátiques la respuesta sía la collaboración gratuita de docentes xubilaos. La única manera d’entender esta propuesta, teniendo en cuenta’l desconocimientu absolutu que tenemos respectu al conteníu de la Resolución que va regular esta participación, ye que l’alternativa que da la Conseyería d’Educación a la dura situación de los docentes asturianos ye la nula inversión en personal y pretender a coste cero que la cosa ameyore cola collaboración desinteresada de los ex-compañeros.

Nengún de los exemplos espuestos nos medios pol Conseyeru al respective de les xeres que van realizar los y les xubilaes, xustifiquen la ellaboración d’una Resolución. La participación d’un ex-xefe d’estudios na celebración d’un aniversariu ye una práctica puntual y compartida por ex-alumnos, families, antiguos profesores, etc. Esto nun esixe un Resolvimientu qu’alce, a rangu de norma, unes actuaciones tradicionales y habituales pa esti tipu d’eventos.

Dende SUATEA pidimos, tal que promovemos dende va años na Xunta de Personal, que s’ameyoren les condiciones llaborales del profesoráu asturianu, que se mengüen los horarios llectivos, que baxen les ratios, que s’esanicien les xeres burocrátiques que nun tean amestaes al llabor docente, ente otres cuestiones.

Nestos momentos los centros educativos tán demandando, al traviés d’allegamientos, más personal pal cursu próximu. El númberu de profesoráu fuera de plantiya y denomináu “necesidaes autorizaes” ta siendo amenorgáu y nun s’atienden les demandes de les direcciones. Tampoco son oxetu de negociación coles organizaciones sindicales, anque dende SUATEA sí la demandemos. La collaboración del profesoráu xubiláu nun va suplir estes necesidaes. La única forma d’atender lo que la calidá educativa demanda ye una apuesta clara pola enseñanza pública, con presupuestu pa contratación de personal y valorando realmente’l trabayu y la función docente que tanto “talentu y potencial” tien según el mesmu Conseyeru declara.

Uviéu, 19 de xunu de 2017

Esta entrada tamién se puede consultar en: Castellanu