Home > Profesoráu > Wert presenta’l borrador del nuevu Estatutu Docente: pa ser docente habrá que superar un esamen d’un idioma estranxeru

Wert presenta’l borrador del nuevu Estatutu Docente: pa ser docente habrá que superar un esamen d’un idioma estranxeru

Wert presentó a los sindicatos un testu que forma parte del esmolecedor Estatutu Docente. Concretamente’l capítulu sobre l’accesu a la función pública docente. Nél plantega ente otres cuestiones la esixencia de realizar un exame oral y escritu en llingua estranxera, l’acreditación d’una abonda competencia dixital o que van poder desixise requisitos de trabayar na empresa privada pa ser docente de FP y maestru de taller. Amás, la ponderación de les notes nel concursu oposición priorizaríase la nota de la oposición frente a la esperiencia docente y otros méritos. Pa llograr una plaza como docente, pos, va ser necesariu superar los esamenes d’idiomes amás de los correspondientes al temariu de cada especialidá.

El despreciu a la esperiencia- daqué que nun tien oldéu en nengún otru sector- xunto cola imposición d’una conocencia de llingües estranxeres que na inmensa mayoría de les especialidaes ye irrelevante pa determinar quien ye meyor docente, marca la propuesta de Wert. SUATEA amuesa’l so total refugu a una propuesta que va dexar nel paru a miles de los interinos ya interines actuales y que parte d’una concepción errónea de lo que se precisa pa ser  docente.

Lo peor dende’l puntu de vista asturianu ye relleer l’alcuerdu – el trágala de la Conseyería d’Educación robláu polos sos dos sindicatos firmantes- pa la ellaboración de llistes d’interinidaes a la lluz de la propuesta ministerial. De primeres, el nuevu sistema d’accesu a la función pública da mayor relevancia a la nota d’oposición frente a la esperiencia. Eso supondría pa les llistes de profesoráu interín asturianu más desequilibriu y un mayor pesu entá de la nota nel apartáu correspondiente, pos la nota del esamen va tener más pesu na nota total del concursu oposición.

Per otra parte, al establecese nel alcuerdu asturianu la obligatoriedá de presentase a oposiciones, esto supondría que l’actual profesoráu interín tendría OBLIGATORIAMENTE que realizar la prueba específica d’idioma oral y escrita. Les consecuencies pueden ser nefastes y añedir al restu de desventaxes coles que cunta’l profesoráu interín asturianu.

La Conseyera d’Educación vuelve amosase como una alumna aventayada de Wert a quien allana’l camín del despidu de profesoráu interín col fin d’aforrase los euros que cuesten los trienios y sexenios que cobra bona parte del colectivu.

Y volvió a facelo tres comunicar a los centros educativos un cambéu nel programa billingüe qu’anguaño funciona nos centros asturianos y que yá foi oxetu de contestación polos sindicatos d’educación.

La enseñanza de los idiomes ye una asignatura pendiente nel nuesu país. Wert punxo en marcha una receta siendo’l so llaboratoriu la comunidá de Madrid, onde se contrató personal nativo ensin titulación pa impartir inglés, o onde s’enllantaron esámenes esternos n’inglés al alumnáu d’infantil…

N’Asturies la Conseyería d’Educación sigue la so fuxida alantre en materia d’enseñanza d’idiomes: anunció una nueva regulación del programa billingüe na que pretende estendese’l programa a la mayoría de los IES pos bona parte del alumnáu de Primaria vieno cursando estes enseñances nos colexos.

Pero la solución adoptada ye la d’esaniciar la hora de refuerzu del idioma que s’impartía a 7ª hora asina como amenorgar a una la materia que recibe cada alumnu o alumna en llingua estranxera. La midida déxa-yos aforrar en profesoráu d’inglés y va na dirección contraria de lo que paez promover. Esto vien a añedise a la conversión de places ordinaries en billingües nos concursos de tresllaos, refugáu esto por tolos sindicatos.

Esto ye, qu’agora van pretender “vender” de forma electoralista la estensión del programa billingüe cuando lo que se va producir va ser un billingüe descafeináu, que va acentuar más l’efectu segregador ente l’alumnáu que quede fuera del programa y que dexa al profesoráu que ta nos centros nuna situación cuandoquier confusa.

Pa tratar con seriedá l’aprendizaxe de les llingües estranxeres ye preciso un debate y un compromisu social que nun pue resolvese ensin un plan de formación del profesoráu al llargu plazu, ensin un analís de cómo favorecer los intercambios escolares, les estancies nel estranxeru pa estudiantes y docentes, ensin un plan p’acabar col doblaxe de películes y dibuxos animaos nos medios de comunicación o ensin un compromisu de que los nuesos dirixentes  políticos dean exemplu y nun nos avergüencen….

Uviéu, 24 d’abril de 2014

Documentu en PDF

Accesu al borrador del Ministeriu

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778