Entamu > Coherencia y Compromisu > SUATEA, l’alternativa sindical sociopolítica

SUATEA, l’alternativa sindical sociopolítica

stes

  • Lluchamos contra la globalización capitalista, ún de los mayores y más devastadores procesos de desregulación llaboral, social y ambiental que se conocen, qu’impón recortes severos nos gastos sociales, reduz los derechos llaborales, esbilla a los países probes, privatiza y mercantiliza en porgüeyu del capitalismu financieru. Nel estáu español, estes polítiques impónense per aciu de la so inclusión nel sistema euro, privándonos de soberanía económica, obligándonos a una devaluación interna ensin acabu previsible a la que llamen austeridá y convirtiendo n’imposible cualisquier política alternativa mientres se permaneza na eurozona.
  • Oponémonos a les reformes llaborales que suponen recular nos derechos sociales y mayores beneficios pa les empreses; qu’abaraten el despidu, faen medrar la precariedá y privaticen les pensiones.
  • Refugamos toles guerres y el militarismu porque nun beneficien a los pueblos y fomenten valores y práctiques totalitaries.
  • Tamién refugamos el recorte de llibertaes civiles y la restricción de los mecanismos de participación democrática que supón la imposición d’una ideoloxía falsamente basada na seguranza.
  • Consideramos que la paz ye un valor esencial pa la convivencia social y pa la igua de conflictos en tolos niveles. La violencia nun s’exerce namás nes guerres, sinón que tamién existe dientro d’unes estructures sociales inxustes. Por ello, en SUATEA comprometémonos cola difusión de la Educación pa la paz con xusticia y coles alternatives de defensa popular non-violenta y en favor d’un mundu más xustu.
  • Valoramos el mediu ambiente como la casa de tou ser vivo. Comprometémonos cola conservación de la naturaleza y somos críticos col actual sistema políticu-económicu, máximu responsable de la so degradación y del espoliu de los ruinos recursos del Planeta.
  • Consideramos que’l laicismu ye la base de la convivencia ciudadana y democrática, en tanto que promueve la llibertá de cada individuu pa creer, o non, en cualisquier relixón o ideoloxía y nun xenera estorbises a la llibertá de conciencia, el debate y la crítica llibre.
  • Desiximos que l’Estáu y el conxuntu de les alministraciones destinen, polo menos, el 0’7% del PIB pa l’ayuda al desenrrollu. Oponémonos al marafundiu en gastos de protocolu y fastuosidá en cimeres, foros, reuniones, armamentu, etc., unes perres qu’han destinase a algamar un mundu más solidariu.
  • Defendemos l’abolición de la delda esterna de los países emprobecíos, ente ellos nós. Hai una situación d’abusu y insolidariedá, articulada dende unes estructures financieres y unes normes inxustes, que faen que países con grandes problemes económicos se vean somorguiaos nuna terrible espiral d’endeldamientu económicu, ensin poder cubrir les sos necesidaes básiques d’alimentación, sanidá y educación. Otra vuelta, nel casu del estáu español, namás ye posible salir d’esti procesu al traviés de la rotura del sistema euro, la recuperación de la soberanía económica y el desendolque de polítiques económiques subordinaes al interés de la gran mayoría social, polítiques que nun son posibles nel marcu de la eurozona.
  • Defendemos el non pagu pola ciudadanía d’una delda inxusta xenerada pa saniar a la banca y que supunxo un deterioru de les condiciones llaborales y retributives del profesoráu.
  • Oponémonos a que los neños y les neñes abandonen la escuela y se-yos obligue a trabayar o a dir a la guerra. Nestes décades la infancia convirtióse nuna de les mayores víctimes de les inxusticies de la globalización capitalista, por fame, enfermedaes, esplotación sexual, mano d’obra barato y oxetivu de los ataques bélicos.
  • Defendemos la igualdá de tola ciudadanía énte l’Estáu. La capacidá d’autogobiernu ha ser igual pa toles CCAA.
  • Consideramos que la igualdá efectiva y real ente muyeres y homes ye un bien social qu’hai qu’algamar pa eliminar la inxusticia más durable y resistente a lo llargo de la Historia, la que fai que les persones tengan distintes oportunidaes y derechos pol fechu accidental y non elexíu de nacer con un sexu o otru.
  • Apoyamos les y participamos nes, xunta con otros movimientos sociales, reivindicaciones de “Les Marches de la Dignidá”, contribuyendo a les movilizaciones que demanden “pan, trabayu y techu” como bases mínimes pa mantener una vida digna.

Disponible en: Castellanu, Gallego-asturianu