Entamu > Condiciones Laborales > Pola meyora de les condiciones de trabayu

Pola meyora de les condiciones de trabayu

Ana Gonzalez

  • Derogación darréu del Real Decreto-ley 14/2012, de 20 d’abril, de midíes urxentes de racionalización del gastu públicu nel ámbitu educativu que supunxo l’empioramientu de les condiciones llaborales del profesoráu asturianu.
  • Estabilidá de les plantiyes docentes. Non a la movilidá forzosa nin a la redistribución d’efectivos (contemplaos nel R. D. del concursu de tresllaos). Non a l’axudicación forzosa de destinos.
  • Negociación añal cola Xunta de Personal de toles criaciones, supresiones, amortizaciones y habilitaciones, asina como de les unidaes y puestos de trabayu. Non a l’amortización de places y non al pieslle d’unidaes.
  • Pola meyora del serviciu educativu cola aplicación de midíes tales como reducción de ratios, desdobles y criación de nuevos puestos de trabayu nos centros educativos.
  • Concursu de tresllaos: convocatoria añal del concursu. N’años alternos: concursu estatal y concursu autonómicu. Facer públiques toles places que vaigan axudicar anantes de facer les peticiones. Axudicación de destinu definitivu a funcionarios de carrera al otru cursu de sacar la plaza nel concursu-oposición. Garantía de mantenimientu de los destinos definitivos algamaos nel concursu de tresllaos. Respetu a los derechos alquiríos pol profesoráu funcionariu. Accesu del profesoráu del Cuerpu de maestros al primer ciclu de la ESO, mientres nun s’algame la reivindicación del cuerpu únicu. Por un concursu de tresllaos cola antigüedá como criteriu preferente.
  • Xornada llaboral de 35 horas selmanales frente a les 37,5 actuales. Reducción de la xornada llectiva en tolos niveles educativos. Regulación específica del horariu y xornada llaboral del profesoráu que trabaya en diferentes turnos nun mesmu Centru, asina como de la reducción de xornada por situaciones específiques.
  • Meyora de les condiciones del profesoráu itinerante. Aumentu de dietes por kilometraxe. Parque móvil pal profesoráu itinerante y, mientres nun s’algame, concesión de créitos ensin intereses pa l’alquisición de vehículos. Seguru a tou riesgu a cargu de l’Alministración.
  • Puestos de desempeñu revesosu: Consideración como puestu de desempeñu revesosu’l del profesoráu itinerante cuando nos sos desplazamientos s’incluyan una o más unidaes que tean reconocíes como d’especial dificultá por razones xeográfiques.
  • Reconocimientu del periodu de 5 meses y mediu de forma continuada o acumulada de permanencia nun puestu como requisitu pa otorgar la puntuación d’añu completu.
  • Otres meyores:
    • Implantación del añu sabáticu. Establecimientu d’un plan que garantice l’accesu a tol profesoráu que lo solicite.
    • Establecimientu d’un plan de permutes temporales n’Asturies o con otres CCAA.
    • Posibilidá d’escedencies de curtia duración con reserva de puestu y consideración del periodu d’escedencia como periodu de cotización efectiva pa causar derechu a prestaciones por xubilación, incapacidá permanente o muerte.
  • Reducción del horariu llectivu a les persones mayores de 55 años, ensin mengua de retribuciones.
  • Xubilación voluntaria anticipada a los 55 años y xubilación col 100% de les retribuciones a los 30 años de serviciu o a los 60 d’edá, incluyíu’l profesoráu interín.
  • Establecimientu de garantíes xurídiques plenes (responsabilidá civil) pa tol profesoráu nel desenrrollu del so llabor docente: n’hores llectives, complementaries y estraescolares.
  • Nomamientu como funcionaria de carrera cola mesma antigüedá que la so promoción a les muyeres que, por permisu maternal o baxes rellacionaes col embarazu, aplazaren el so períodu de práctiques.
  • Eliminación de la obligación d’itinerar pa les muyeres embarazaes dende que se tenga conocimientu del embarazu.
  • Tresparencia y facilidá de control públicu nes rellaciones cola Alministración (control de faltes, nómina…).

Disponible en: Castellanu, Gallego-asturianu