Home > Comunicaos > Valoración fuelga de profesoráu interino

Valoración fuelga de profesoráu interino

 

VALORACIÓN FUELGA PROFESORÁU INTERINO

SUATEA convocó una xornada de fuelga del profesoráu interino pa güei, 24 d’abril. Anque’l siguimientu foi desigual, consideramos que la fuelga consiguió l’oxetivu qu’persiguíemos: amosar la preocupación y esmolición del colectivu énte’l riesgu de perder l’empléu, qu’en dellos casos va ser de forma inminente.

Según datos llograos por esta Organización Sindical a última hora de la mañana, la fuelga foi secundada por cerca’l 40% del profesoráu interino y tuvo una incidencia mayor nos cuerpos de Secundaria y Formación profesional, con más siguimientu nes especialidaes que tienen convocatoria d’oposiciones pa esti branu y, polo tanto, mayores posibilidaes de perder l’empléu. En Primaria, el siguimientu foi menor porque les oposiciones van celebrase en 2019 y el personal interino tien garantizáu l’empléu pal próximu cursu. Paeciónos absolutamente improcedente que la Conseyería dea datos de siguimientu de la fuelga de les 9.30 de la mañana cuando saben perfectamente qu’a esa hora ye imposible conocer los datos reales. Ello ye que na mayoría de centros afirmáronnos que yera prematuro avanzar datos enantes les 12 la mañana.

La principal reivindicación d’esta fuelga ye llograr un Plan estabilidá pal profesoráu interino, esto ye, “quien ta queda”. Esto nun quier dicir que queramos facer fixos a interinos ensin aprobar una oposición, tal como declaró ayeri’l conseyeru, sinón que buscamos que los interinos d’Asturies tean nes mesmes condiciones que los d’otres CCAA y que tengan garantíes d’estabilidá.

¿Por qué ye necesariu un Plan d’estabilidá?

  1. El 29 de marzu de 2017 roblaron un alcuerdu CCOO, UGT y CSIF y el Ministeriu de Facienda nel que se comprometieron a amenorgar la tasa d’interinidá al 8% en tol sector públicu, y nós valorámoslu negativamente nel so momentu porque nun tuvieron en cuenta ciertes midíes conducentes a consolidar o garantizar l’emplegu del personal interino qu’ocupa esos puestos. Nel sector educativu, y en concreto n’Asturies, la tasa d’interinidá ye del 32%, que nós reconocemos que ye un porcentaxe enforma altu pal sistema educativu, sicasí, foi responsabilidá de l’Alministración asturiana llegar a esa alta tasa, pues n’Asturies les places ufiertaes nes convocatories d’oposiciones de los últimos años fueron bien escases y eso supunxo llegar a esta elevada tasa d’interinidá.

La concreción d’esi alcuerdu n’Asturies implica la convocatoria pa 2018 de 450 places repartíes por 27 especialidaes. En dalgunes, ufiértense más places que vacantes ocupaes por personal interino, lo que va suponer ensin dulda que quien nun superen los procesos selectivos van perder l’empléu.

  1. Proponemos un plan estabilidá pal profesoráu interín porque ye llexítimo y ye realista. Ye llexítimo porque en munches CCAA tienen planes d’estabilidá pal personal interino y, polo tanto, nun van ser despidíos en casu de nun superar los procesos selectivos; ye realista porque, si se revierten los retayos, esto ye, si s’amenorga l’horariu llectivu del profesoráu a lo qu’había antes de los retayos de 2012, crearíase un puestu de trabayu por cada nueve profesores. Esto ye, el sistema precisaría, según pallabres del mesmu conseyeru, contratar a más de mil profesores.
  2. La situación d’Asturies frente a otres CCAA. N’Asturies, l’alcuerdu d’interinidá robláu por UGT y ANPE fomenta la rotación permanente porque se rebareman les llistes dempués de cada procesu selectivu, lo que supón que la xente puea perder puestos y l’empléu cada vez que se rebaremen llistes. Nós queremos un sistema distintu, un sistema que, tal como asocede n’otres CCAA, garantice la estabilidá del colectivu interín y puede llograse de distintes formes:

– Garantizar un compromisu de contratación de trés o más años prorrogables (Baleares), que ye similar al que roblamos n’Asturies nel añu 2000 y qu’ANPE echó embaxo nos tribunales.

– Llistes estables y ensin rebaremación, qu’eviten la rotación nel empléu (Cantabria, Murcia). Los nuevos aspirantes incorporense al sistema de siguío o nuna segunda llista de sustituciones.

– Ordenación de llistes por rigorosu orde d’antigüedá, tal como lo xestionen en Galicia, Andalucía, Valencia, País Vascu y Cataluña.

– Garantía d’estabilidá pa mayores de 55 años hasta la xubilación (Canaries, Murcia, Andalucía, Valencia).

Esto ye, cualquier midida que suponga que quien nun llogre superar procesos selectivos nun sía despidíu/ida. La responsabilidá de cualquier organización sindical ye garantizar l’empléu de los y les  trabayadores n’activu. Si’l conseyeru nun respuende a los nuesos pidimientos, vamos actuar con responsabilidá y vamos siguir con movilizaciones ya informando al profesoráu del riesgu real de que dellos centenares de compañeros y compañeres pierdan l’empléu de forma inminente.

El Secretariáu de SUATEA

24 d’abril de 2018

 

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743