Valoración del entamu de cursu 2016/2017

L’entamu del cursu presente, precedíu por toles incidencies derivaes de la convocatoria de les oposiciones, anicia trayendo de rastru los problemes y les comenencies de los cursos anteriores. Los retayos que s’aplicaron, aparte de nun revertilos, tán valiendo p’aplicar enriba d’ellos más axustes en cuestiones como la disminución de la natalidá, ensin mirar otres alternativas posibles.

Polo que diz a les condiciones llaborales del profesoráu, nun se dio avance nengún. Delles de les condiciones del funcionariáu asturiano que se recuperaron el cursu pasáu nun afectaben al personal docente, polo que siguimos sufriendo los mesmos axustes que cuando’l peor momentu de la crisis:

• L’aumentu de la carga horaria impuesta en Secundaria repítese esti curso. Siguimos ensin noticies del anunciu del Conseyeru sobre reconsiderar les hores complementaries y Asturies permanez na llista de CCAA onde se trabayen más hores llectives de tol Estaáu.
• Los salarios tampoco nun se modifiquen y nestos momentos tamos nell últimu puestu en retribuciones percibíes. Dende SUATEA siguimos reivindicando la equiparación salarial y que se termine con esta discriminación de los docenes asturianos.
• A una parte grande del profesoráu itinerante débese-y parte de la indemnización que-y correspuende según l’Acuerdu vixente, magar les promeses repitíes nos medios pola Conseyería de que diba a abonase llueu esa cantidá.
• La falta de diálogu y d’espacios de intercambiu de criterios, opiniones y propuestes ye la tónica que paez que va continuar, tempatonando’l papel de les Organizaciones Sindicales pa contribuyir a meyorar el sistema educativu asturianu y la so planificación. Nun podemos quedar plasmaos mientres se tomen decisiones unilaterales o se dan informaciones cuando los fechos yá tán consumaos como pasoó’l cursu pasáu colos pieslles o fusiones de dellos de centros.

Polo que toca al colectivu de profesoráu interín, tampoco nun hai avances respecto a cursos anteriores:

• La publicación de les llistes d’interinidá faise prematuramente, ensin resolver les incidencies y errores que los docentes declararen. Tovía güei nun se sabe si se iguaron parte de les reclamaciones realizaes y nun hai intención d’asoleyar una llista definitiva actualizada.
• A la primer convocatoria de places, tremada de munchísimes medies xornaes, súmase agora otra mui numberosa, con más de doscientes vacantes que nun s’ofrecieren na primer vuelta. Esto trai desaxustes ya inxusticies nel orde de prelación de los aspirantes, con xente destinao a puestos más llonxanos que los que van poder garrar persones que tán muncho más abaxo nes llistes. Dende SUATEA reiteramos la necesidá de que se convoquen toles vacantes na primer convocatoria o que se permitan opciones como la “meyora de puestu”,tal como s’apliquen cuantayá n’otres CCAA.
• L’Acuerdu de profesoráu de discapacidá tamién se punxo a preba y comprobamos que la so aplicación real ta mui lloñe de llograr los oxetivos pa los que se concibió. L’escasu númberu de places axudicaes al colectivu aplicando la discriminación positiva requier una reflexón pa tomar midíes que corrixan esti desfase.

SUATEA propón movilizaciones escontra la LOMCE a la comunidá educativa.

La situación nos centros educativos ye alloriante pola mor de la implantación de la LOMCE y los desenvolvimientos llexislativos que ta aprobando’l Gobiernu en funciones. La última normativa que regula les reválides de 4º de la ESO y 2º de Bachillerato supón otru pasu más pa llantar un sistema que la Comunidá Educativa ta refugando dende’l principiu.

Anque esti cursu les reválides nun van quitar d’obtener la titulación nin d’entrar en  Bachilleratu o FP, la verdá ye que la so pura existencia va condicionar tol desenvolvimientu del cursu y xenerar más inseguridá y rocea ente’l profesoráu y l’alumnáu.

El casu de los que cursen Bachilleratu ye tovía más: obligóselos en 1º a matriculase de materies ensin conocer cuáles puen acabar siendo obligatories p’acceder a determinaos estudios posteriores, y en 2º la reválida solo se considera en 9 Universidaes como equiparable a l’antigua PAU.

Sigue ensin sabese cómo la preba estatal se va afayar a los currículos diferentes de  cada CCAA o la posibilidá de qu’otres Universidaes vaigan a facer exámenes específicos como-yos permite la mesma LOMCE.

Polo que respecta al profesoráu, el despreciu al so llabor, -les evaluaciones esternes ponen baxo sospecha el trabayu docente-, faen que tola comunidá educativa sufra les consecuencies d’esta Llei y que seya imprescindible convocar movilizaciones pa esti  primer trimestre de cursu nun marcu estatal que respuenda darréu y contundente al Gobiernu en defensa de la educación pública.

Uviéu, 14 de setiembre de 2016