Home > Comunicaos > Valoración de SUATEA énte la falta d’alcuerdu sobre’l profesoráu interín

Valoración de SUATEA énte la falta d’alcuerdu sobre’l profesoráu interín

Esta mañana reunióse la Mesa Sectorial d’Educación col envís de que los sindicatos manifestaren la so posición sobre’l postrer documentu que presentara l’alministración. Yera’l momentu de dicir sí o non a una propuesta que diba regular les condiciones llaborales del profesoráu interín asina como la ellaboración y xestión de les llistes d’aspirantes a interinidá.

De les cuatro organizaciones sindicales que formamos parte d’esta Mesa Sectorial, namás ANPE manifestó la so disponibilidá a la firma. El restu refugamos apoyar l’alcuerdu y eso torgó qu’ésti saliera p’alantre.Esti desalcuentru ente l’alministración y la parte social de la comunidá educativa ye unu más de los que se tan dando a lo llargo del cursu. Primero foi la convocatoria d’oposiciones, depués la publicación de les plantiyes, siguieron les unidaes autorizaes nos centros (poles que siguen les movilizaciones en delles escueles de Xixón) y agora tocó a la estabilidá de los docentes interinos.

La demanda más repetida nesta cabera reunión foi la d’allongar la negociación. Dende SUATEA manifestemos el nuestru interés en negociar y en llegar a un alcuerdu, pero nun podíemos firmar lo que suponía un recule pal profesoráu interín. Entendemos amás que, con esta propuesta, non solo se xugaba cola inestabilidá de los que trabayen anguaño, sinón qu’hipotecaba les condiciones llaborales de tolos que nun futuru accedan a la función docente. Les condiciones del alcuerdu suponíen llantar un sistema de rotación nel empléu qu’engordaría la yá enorme bolsa de trabayadores en precario que se ta faciendo nel nuestru país.

Dende l’alministración ianecióse en qu’énte l’ausencia de pautu procederíase a sacar de forma unillateral una resolución normativa que regule toos estos asuntos y que contemplará unes condiciones qu’empioren incluso los aspectos a los que se llegara a consensu. En SUATEA creemos que dende la Conseyería volveríase a cometer un enorme error si procede a facer esto. Xeneraría otra vuelta una tensión na Comunidá Educativa que podría repercutir incluso nel trescursu normal de l’actividá docente. Les consecuencies pa los docentes afectaos seríen dramátiques yá qu’empobinaríen al paru, en cada procesu selectivu, a cientos de docentes ensin consideración al valir del llabor fechu nin a les bones notes sacaes n’oposiciones anteriores.

Recapitulando de tol procesu lo primero qu’hai que señalar ye la priesa cola que se fexo la negociación. El calandariu tuvo marcáu pola intención de l’alministración en convocar unes oposiciones nes piores condiciones posibles pal personal afectáu y nun dio oportunidá de tratar de forma curiosa les diferentes cuestiones que punximos enriba la mesa.

El borrador que se presentó de primeres suponía una provocación que’l profesoráu afectáu recibió como una afrenta que cuestionaba la calidá del so llabor docente dau l’escasu valir que s’apurría a la esperiencia. La nuestra decisión en SUATEA foi dir a la primer reunión demandando la retirada dafechu del documento. Vemos un error la estratexa d’otres organizaciones sindicales qu’entraron nesi primer momento a negociar dellos conteníos que figuraben. Creemos que’l refugu unánime de tola parte social daba más fuercia nes negociaciones posteriores y posibilitaba un alcuerdu más aceptable a lo cabero’l procesu.

Con esi puntu de partida, foi fácil pa la Conseyería modificar esi primer documentu ensin renunciar a los aspectos que nós vemos más trascendentales y que yeren la barrera que garantiza la estabilidad en el empleo.

El nuestru oxetivu ye protexer, igual que se fai dende cualesquier otru ámbitu llaboral, les condiciones de trabayu de les persones qu’accedieron a l’actividá docente. Esto ye más importante tovía si vemos que falamos de casi la cuarta parte del conxuntu del profesoráu qu’hai agora n’Asturies. Esti colectivu al que se pon agora en cuestión ye responsable, igual que’l restu de docentes, del correctu funcionamientu del sistema educativu asturianu. Tienen polos proyectos educativos que se faen nos centros, compensen col so sobreesfuerzu l’aumentu de la ratio y de les hores llectives, en dellos casos incluso asumen responsabilidaes directives énte l’ausencia de funcionarios de carrera. Son en definitiva una parte indispensable del sistema que nun puede sustituyise de manera irresponsable.

Los elementos clave de les nuestres propuestes veníen determinaes por algamar:

–       La desvinculación ente la permanencia nes llistes y la presentación a les oposiciones
–       Que nel conxuntu de la puntuación el pesu de la esperiencia tea perriba d’otres consideraciones
–       Que puean apurrise les notes d’oposición más favorables

Nesi sentíu, propunximos

–       Que la esperiencia se ponderara de forma inversa a como proponía l’alministración. Valorando más los primeros años que los caberos axustándonos a la realidá de los interinos y interines nos que la mayoría tien una antigüedá que ta ente los 10 y 13 años, pero al mesmu tiempu ensin despreciar el valir de los que lleven más años exerciendo la docencia.
–       Plantegamos les estorbises técniques que se derivaben de la obligación d’acreditar les notes d’otres Comunidaes nel tiempu y forma que desixen los ritmos de la nuestra propia alministración
–       Que’l desixir una puntuación de 5 na primer prueba de la oposición s’aplicara a les persones que tán fuera del sistema pa poder entrar a formar parte del mesmu.
–       Que s’axuntara como méritu específicu tener trabayao n’Asturies y asina compensar la discriminación que sufrimos respecto a les CCAA que mos arrodien y que tienen sistemes que blinden a los sos propios interinos
–       Que nos criterios d’ordenación de les llistes la esperiencia docente tuviera en primer llugar perriba de la nota d’oposición.
–       Que s’eliminaren los puntos que s’apurríen por aprobar les fases del procesu selectivu al entender que yeren na práctica una sobrevaloración añadida a la nota d’oposición en perxuiciu de l’antigüedá.
–       Que se metiera la posibilidá de “Meyora de puestu”. Ye una forma de compensar les inxusticies que se dan al nun se convocar toles vacantes na primer convocatoria. L’exemplu del funcionamientu d’esti sistema tenémoslu na comunidá cántabra, que de forma áxil y informatizada permiten peles dos y tres primeres convocatories tener opción a cambiar de plaza en casu d’apaecer vacantes con posterioridá a la so adxudicación.
–       Y, como elementu fundamental, la necesidá de prorrogar el proceso pa tratar tolos aspectos rellacionaos coles condiciones llaborales que nun dio tiempu a considerar con procuru. Ente ellos tán la situación de los que tán en bolses porque nunca tuvieron procesos selectivos, la resolución en casu de fallos informáticos que nun supongan mandar al paru a los afectaos, iguar el problema de la discriminación que sufre la especialidá de Primaria, etc.

En definitiva, el llabor de SUATEA basóse n’intentar un diálogu ensin presiones nin prises, que permitieren encarar la xestión del profesoráu interín col envís de meyorar el Sistema Educativo, yá que too ello debería formar parte del interés global en llevantar un serviciu públicu de calidá al serviciu del conxuntu de la ciudadanía.

Uviéu, 4 d’abril de 2014

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339