Profesoráu itinerante: Valió d’engaños

Esta entrada está disponible en: Castellano (Castellanu)

La Conseyería d’Educación, al traviés de los medios de comunicación y en conceyu colos sindicatos firmantes del Alcuerdu Sobre les Condiciones de Trabayu del Profesoráu Itinerante (en vigor dende 2001), denunció esti alcuerdu hai unos díes. Ello trai como consecuencia que pal cursu que vien tendrá que negociase con toles centrales sindicales un Alcuerdu nuevu, anque  hasta qu’acabe esti cursu nun hai dulda que’l de 2001 sigue vixente. El Conseyeru sábelo, pero lleva incummpliéndolu yá dende primeros de cursu al nun pagar al  profesoráu itinerante por tolos conceptos fixaos nel puntu 5.1 del alcuerdu, lo que traxo como resultáu el que deba importantes cantidaes de dineru al profesoráu itinerante (en munchos casos más de 1000 €).

La denuncia actual del alcuerdu demuestra qu’acabar dafechu con elli yera la verdadera intención que tenía dende primeros de cursu pa, per un llau, arrebañar perres de los bolsos vacios del profesoráu itinerante y tapar con elles los furacos presupuestarios, munchos d’ellos que vienen yá d’una xestión nefasta y otros d’aplicar, como alumnu aventaxáu del PP, los retayos establecíos pol gobiernu de Madrid. Trátase de preparar el camín a un nuevu alcuerdu d’itinerantes que va precarizar más entá les condiciones llaborales d’esti profesoráu y va retayar les plantiyes de los Centros rurales Agrupaos (CRAS). Pel mediu’l camín, pasaron los meses con una riestra de promeses  pa engañar al profesoráu itinerante y a los sindicatos firmantes del alcuerdu. Prometióse que se diba a cumplir lo apautao estableciendo nuevos formularios pal pagu por kilometraxe. Al mesmu tiempu, la Conseyería ye culpable de xenerar un caos de xestión que da llugar a situaciones d’impagu y pagos parciales ensin especificar conceptos. Ello xenera  agravios comparativos ente’l profesoráu ya indefensión énte les futures reclamaciones pela vía alministrativa o contenciosa en demanda de los derechos salariales.

El profesoráu itinerante ta fartucu yá de mentires y engaños, de declaraciones de prensa onde’l Conseyeru d’Educación insinúa que los/les itinerantes cometen irregularidaes detectaes pola Secretaría Xeneral Técnica solicitando nos formularios compensación polos kilómetros dende la so casa… y too ello pa xustificar unos retayos que nun respeten l’actual alcuerdu en vigor.

Por ello, SUATEA  participa y apoya la caravana de coches que se realizará hoi a les seis de la tarde con salida dende la Conseyería Educación  pa desixi-y:

  1. El pagu inmediatu de les cantidaes adeudaes al profesoráu itinerante.
  2. La liquidación mensual de les siguientes indemnizaciones.
  3. L’aumentu de la indemnización económica por Km percorríu.
  4. Completar la cobertoria del seguru del coche hasta tou riesgu con sustitución del vehículu en casu accidente.

El secretariáu de SUATEA.

N’Uviéu a 26 de mayu de 2016.

 

Print Friendly, PDF & Email

Esta entrada está disponible en: Castellano (Castellanu)