Home > Comunicaos > Unos presupuestos qu’afueguen a la educación pública asturiana

Unos presupuestos qu’afueguen a la educación pública asturiana

UNOS PRESUPUESTOS QU’AFUEGUEN A LA EDUCACIÓN PÚBLICA ASTURIANA
Depués de la presentación de los Presupuestos p’Asturies nel parlamentu asturianu, la sangría sigue.
Nun analís d’urxencia sobre la evolución del gastu públicu n’educación y énte les propuestes de los partíos políticos pa les próximes elecciones xenerales, SUATEA quier esponer la so reflexón sobre la situación del enseñu na nuestra comunidá.
SUATEA fixo un análisis de los grandes númberos dende l’añu 2009, cuando empezaron a materializase de manera brutal los retayos en materia social.
Los gráficos que presentamos bien claro lo amuesen: Dende 2009 hasta 2015, la perda porcentual del gastu destináu a Educación nos presupuestos asturianos ye del 14’59%.
Sicasí, estos díes apaecieron estudios y programes electorales que resalven la verdadera situación de la educación: los retayos fueron radicales y pa recuperalos fadría falta una medría de la inversión perriba de los 14 puntos porcentuales.
Como puede vese, les principales afectaes son partíes como la formación del profesoráu. La desapaición de la rede de centros de formación y la mengua de les partíes dedicaes a esti fin retraten a una alministración que nun fai les sos funciones y abandona al profesoráu a la so suerte.

cuadro1

D’esta manera faen l’agostu delles organizaciones -inclusive sindicatos- que se dediquen a vender cursos, desque l’Alministración, que tendría que ser la que forma al so personal, nun cumple les sos obligaciones.
Tamién ye significativu’l drásticu retayu a les partíes dedicaes a la Enseñanza Secundaria, obligatoria y post-obligatoria. La medría tanto del horariu llectivu como del non llectivu na enseñanza secundaria -que como demostró SUATEA nun tien comparanza col restu del Estáu- sirvió a les socesives alministraciones pa facer caxa a costa del sobreesfuerciu del profesoráu, pa retayar l’atención a la diversidá y pa empiorar les condiciones nes que s’imparte la docencia. La medría de la precariedá y de les tases d’interinidá, según unes ratios qu’aumenten mientres se recorta’l númberu de docentes que trabayen n’Asturies, son les consecuencies lóxiques d’una política restrictiva qu’afecta a tola comunidá educativa.
Los gráficos amuesen, a última hora, que los retayos afecten a la inmensa mayoría de les partíes educatives. Coles mesmes, estos

díes, el profesoráu de la escuela pública asiste plasmáu a una campaña de desprestixu y descreitu énte la sociedá. Por ello, SUATEA quier facer públiques estes partíes y asoleyar lo que tolos docentes d’Asturies sabemos: Que los retayos tán afogando a la escuela pública; que’l que se quier formar tien que lo pagar del bolsu y que cada vez se destinen menos recursos a sofitar el trabayu de los docentes. Nesta situación, la propuesta de presupuestos ye un mal parche que pa poco va valir. El profesoráu precisa menos horariu llectivu, contrataciones a tiempu completu que dexen atender tolos llabores derivaos de la mayor complexidá social y de los graves problemes que carez la infancia y la mocedá asturianes, asina como un plan curiosu d’inversiones en construcción y meyora de centros educativos.
Con estes cifres, entós, lo que se demuestra ye que lo que precisa la enseñanza pública ye una inversión sostenida pa recuperar lo perdío.

TABLES B

 

Secretariáu de SUATEA
Uviéu, 1 d’avientu 2015

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3743