Universalizar places en 0-3 y regular 0-6 – Comunicáu

Esta entrada está disponible en: Castellano (Castellanu)

SUATEA esixe universalizar la ufierta de places na etapa EI (Educación Infantil) 0-3 años y una regulación asturiana y estatal de la etapa EI 0- 6 años.

Vemos estos díes na prensa como la demanda d’escolarización de menores de trés años fecha por delles families de Posada de Llanes foi refugada. Esto débese a la falta de planificación y coordinación ente’l Conceyu y la Conseyería d’Educación. La planificación de l’atención educativa d’esta etapa ta regulada polos diversos convenios que s’establecen ente munchos de los conceyos asturianos y la Conseyería. La non almisión de matrícula en Posada constata qu’esi modelu de convenios nun val pa garantizar la prestación d’un serviciu educativu universal con calidá, calidez y equidá.

Anque tou neñu/neña tien, dende la so nacencia, derechu a la educación, entendida como un procesu continuu a lo llargo de tola vida, esti derechu nun ye respetáu cuando les nueses alministraciones educatives nun atienden les demandes d’escolarización na etapa EI 0-3 (casu de Posada de Llanes), nun la ufierten en toles poblaciones (casu de munchos pueblos asturianos), o bien la dexen en manes privaes (guarderíes) nes que, mayoritariamente, empréstase un serviciu asistencial de cuidu y guarda, refugando’l calter educativu de la etapa. Esti calter educativu cuestiónase o matízase de cutio magar  que, a partir de la LOGSE (1990), les socesives lleis educatives reconocieron el ciclu 0-3 como un primer ciclu d’Educación Infantil. Por eso, dende SUATEA y la Confederación Intersindical (C.I.) queremos impulsar la consideranción de tola etapa 0-6 como educativa y desaniciar dafechu la vieya concepción asistencial qu’en munchos casos inda subsiste.

Tres un estudiu realizáu apocayá pola Confederación de STEs-i, a la que pertenez SUATEA, constátase qu’en tol Estáu esiste una lexislación desemeyada o ausencia de la mesma, falta d’ufierta pública y de gratuidá, proliferación de places privaes y creciente esternalización y concertación d’otres, persistencia de munchos centros asistenciales ensin regulación dalguna. Nesti sentíu, hai que destacar la falta d’implicación xeneral de l’Alministración Asturiana -que tien les competencies educatives- y la desdexación de funciones nes alministraciones locales cola Escuela 0-3. Nesi estudiu, tamién constatemos la peralta tasa de feminización del personal que trabaya na etapa y dellos problemes llaborales: vixencia de convenios precarios, ausencia de la consideranción de personal educativo a les/los trabayadores de centros reconocíos de 0-3, salarios bien baxos, etc.

A nivel estatal, la nuesa Confederación ta esixendo que l’Estáu, al traviés de midíes reales de conciliación qu’impliquen al sistema productivu empresarial, facilite a les families el tiempu y los recursos necesarios pa educar a los sos fíos y fíes dientro de la mesma familia, pero ensin dexar de promover y desenvolver instituciones educatives qu’ufierten una educación de calidá afecha a les característiques y necesidaes del alumnáu d’estes edaes.

Poro, reivindicamos la esistencia d’una regulación marcu  xeneral de tola etapa 0-6 años basada en dos principios: tien de tener un calter educativu y tien d’establecer midíes p’atender gratuitamente na rede pública a toa persona que demande esti serviciu promoviendo la universalidá de la etapa. En nengún casu vemos xustificao que se concierten nuevos centros d’educación 0-3 años y, pasu ente pasu, hai que tender a dir esaniciando los conciertos primeramente esistentes nesti tramu como en toles etapes del sistema educativu. Nel terrén puramente llaboral, reivindicamos la dignificación de les condiciones llaborales de les persones que trabayen nesti ámbitu, acabando cola so precariedá, los baxos salarios y la escasa consideranción.

En Asturies, SUATEA esixe:

  • Atender toles demandes d’escolarización EI 0-3 onde yá esistan escueles abiertes.
  • La integración del Primer Ciclu d’Educación Infantil na Conseyería d’Educación.
  • El caltenimientu y l’afitamientu de los puestos de trabayu de toel personal docente y non docente que ta trabayando anguaño na rede d’escueles públiques municipales, pasando a depender orgánicamente de la Conseyería d’Educación.
  • El desenvolvimientu normativu necesariu pa establecer y consolidar toes estes esixencies.
  • La universalización de la ufierta educativa na etapa EI 0-3 a tola población asturiana.
Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757