Home > Aición sindical > Una otra oportunidá perdía p’algamar una xuba salarial pa tol profesoráu asturianu

Una otra oportunidá perdía p’algamar una xuba salarial pa tol profesoráu asturianu

ANPE, FETE-UGT, ConseyeriaEsta mañana celebróse la mesa sectorial d’educación pa tratar el tema de l’adhesión a un nuevu plan d’evaluación a partir de xineru del 2015, un intentu claru del gobiernu n’influyir nel resultáu de les Elecciones Sindicales que se van celebrar el día 4 d’avientu, en condiciones deplorables, d’otra parte. Una vuelta más desde SUATEA pidimos a l’Alministración rectificar y aprovechar esti momentu pa facer una xuba salarial pa tol profesoráu asturianu.

L’Alministración niégase dafechu a esta midía y anecien en zarrar les puertes a igualar el salariu de los docentes asturianos cola media del restu de comunidaes autónomes.

Atopámonos con una Alministración siguiendo la llinia trazada por Ana Rosa Migoya nos sos bonos tiempos. Nun son quien a reconocer que la llei d’evaluación nun tien nengún antecedente en tol territoriu estatal y que ye camín esbrozáu pa les evaluaciones de la LOMCE, cosa de la qu’asemeya tar mui arguyosos. Llegando al puntu de vanagloriase de que les Comunidaes gobernaes pol PP s’interesen por esti “experimentu”.

Asina muéstrase la incoherencia d’una Conseyería d’Educación qu’argumenta faciéndose en contra de la LOMCE y alministrativamente mándase d’instrumentos que venceyen salariu a resultaos desendolcando polítiques mercantilistes al más puru estilu PP.

Deberíen avergoñase y reconocer los erros cometíos polos sos predecesores – imputaos dellos en casos de corrupción-, pero al contrario y nuna nueva huída p’alantre pretenden perpetuar la discriminación nel tiempu.

Pa ello cuenten cola inestimable colaboración d’organizaciones sindicales qu’agora rasguen les vestidures porque un 45% del profesoráu asturianu nun cobra los “incentivos” venceyaos a la llei d’evaluación. Ellos cola so firma son los culpables d’avalar a l’alministración pa impedir que’l profesoráu asturianu accediere a xubides salariales como les existentes notres CCAA y que en nengún casu tienen vinculación cola evaluación efectuada poles direcciones de los centros.

Los que conviden a los sos actos a altos cargos del Ministeriu d’Educación o de la Conseyería, responsables de los recortes y de la degradación a la que se ta sometiendo a la escuela pública asturiana, los qu’avalaron cola so firma la política salarial restrictiva d’esti gobiernu, los que pactaron pa que’l profesoráu interín asturianu y el profesoráu funcionariu más mozu siga discrimináu quieren engañar al profesoráu y facese les víctimes d’una situación qu’ellos propiciaron.

SUATEA sigui esixendo una xuba salarial pal profesoráu asturianu, una homologación retributiva col restu de CCAA y una meyora de les condiciones llaborales del profesoráu.

Uviéu, 1 d’avientu del 2014

SECRETARIÁU DE SUATEA

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4339