Home > Comunicaos > Una oportunidá perdía

Una oportunidá perdía

Una oportunidá perdía. SUATEA llamenta que nun s’abra un procesu de redaición de nuevu Acuerdu d’Interinidá.

Güei llunes 26 d’ochobre pola mañana, aconceyóse la Mesa Sectorial d’Educacióna para siguir col alderique empecipiáu la selmana anterior sobre la propuesta de l’Alministración pa modificar un puntu del actual alcuerdu que regula les llistes de profesoráu interino, dándose por zarrada la negociación cola aprobación d’unos criterios pa la confeición de nueves bolses d’aspirantes a interinidá colos que SUATEA nun ta d’alcuerdu.

D’equí p’arriba, pa facilitar el trabayu d’Alministración, cuando se faiga convocatoria pa una nueva bolsa d’aspirantes, va tenese en cuenta como elementu de prelación. La nota del espediente académicu, dexando de llau la esperiencia docente, que queda arrequexada como simple elementu de desempate.

Dende SUATEA queremos manifestar delles considerancies:

1/ Ye la primer vez que l’actual equipu de la Conseyería convoca a una xunta pa falar de modificar l’actual Alcuerdu d’Interinidá. El nuesu sindicatu manifestó en repitíes ocasiones el nuesu deséu de proceder a la ellaboración d’un nuevu alcuerdu que sustituya al vixente actual.

2/  Ficimos una propuesta concreta plantegando una filera de cambeos de redaición fundamentales p’acabar cola rotación nel empléu, estabilizando al profesoráu, pa dar prelación a la esperiencia docente, pa desvenceyar les llistes d’interinidá de la oposición, cola idea de que, si esistiera voluntá de negociar, se pudiera crear un grupu teúnicu de trabayu qu’entamara esi procesu de redaición del nuevu Alcuerdu. La rempuesta llograda foi que ye urxente esti cambéu concretu, ensin entrar a valorar la posibilidá d’avanzar na llínea plantegada pol nuesu sindicatu.

3/ Llamentamos que, finalmente, s’apruebe un cambéu que prima l’espediente académicu en llugar de valorar la esperiencia docente acumulada. Creemos que se pierde la posibilidá d’avanzar na vía d’afitamientu de los puestos de trabayu. Per otru llau, vemos con esmolición la posible apaición de nueves bolses en distintes especialidaes que se van formar con criterios distintos a los utilizaos hasta esti momentu. Esmoleznos esti aspeutu porque va acabar xenerando diferencies ente aquelles materies nes que se convoquen procesos selectivos y les que non. Nestes últimes van perpetuase, col pasu del tiempu, estos criterios que consideramos contrarios a la estabilización.

4/ Vemos con decepción que’l restu d’organizaciones sindicales de la Mesa Sectorial avalen esti cambéu polos aspeutos enantes señalaos y porque nos asitien énte la perda de lo que consideramos una oportunidá p’abrir pasu a un nuevu Alcuerdu. Igualmente, llamentamos la falta de voluntá política, a tenor de lo espresao nes xuntes, de l’Alministración p’avanzar na necesidá del nuevu Alcuerdu.

5/ A lo último, queremos aportunar nel fechu de que, na llínea de la Sentencia del pasáu 19 de marzu del TJUE, ye responsabilidá de l’Alministración entrar a correxir les contrataciones en fraude ley si nun quieren ser oxetu de sanción per abusu de tala práutica.

                                Uviéu/ Uviéu 26  d’ochobre 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348