Home > Comunicaos > Un nuevu Alcuerdu d’interinidá ye imprescindible

Un nuevu Alcuerdu d’interinidá ye imprescindible

Güei xueves 22 d’ochobre pela mañana, celebróse una xunta de la Mesa Sectorial d’Educación convocada pola Alministración, para facer un cambéu del Alcuerdu que regula les llistes de profesoráu interino que, nos últimos años, vien suponiendo un terciu del total de la plantiya nuna situación de precarización medrante de les condiciones llaborales col aumentu de contratos a media xornada.
Consideramos inaudita esta propuesta de cambéu, qu’afeuta namás al artículu 16 sobre la constitución de bolses d’aspirantes a interinidá basándose solo nel espediente académicu como criteriu de baremación, dexando ensin valor la esperiencia docente que puean apurrir persones que trabayaron como docentes y quedaron fuera por cualesquier circunstancia.
La convocatoria d’esta Mesa Sectorial respuende, tal como reclamemos, a buscar un sistema axilosu de sustitución de baxes (reguláu nel alcuerdu d’interinidá actual), pa combatir los efecutos de la pandemia. Sicasí, quedó bien lloñe de les nueses mires, pos la convocatoria d’esta Mesa tendría de ser la oportunidá pa cambeos de fondu y pa encetar un nuevu Alcuerdu d’interinidá que protexa al profesoráu interín asturianu y que cunte con mayores sofitos de la parte social, una y bones l’actual namá cuntó col aval de solu dos organizaciones de la Mesa Sectorial.
Desque entramó a furrular l’actual Alcuerdu d’Interinidá, SUATEA denunció de forma repitida la esistencia de condiciones lesives pal profesoráu interino asturiano, tanto polo qu’implica dichu alcuerdu (rebaremación de llistes, inestabilidá nel empléu y rotación constante de los puestos de trabayu, inclusive perda d’empléu por cayer de llista al nun poder participar nes oposiciones, escasa valoración de la esperiencia docente nos méritos, etc.) como pola situación de desventaxa que xenera al respective de los esistentes n’otres comunidaes autónomes, onde’l profesoráu interino tien más proteición y mayor estabilidá, lo que da tamién nuna mayor estabilidá de les plantiyes y mayores beneficios pal sistema educativu.
Sicasí, vemos con sorpresa que los cálculos de l’Alministración queden nun cambéu pequenu que facilita pa l’alministración el procesu d’ellaboración de les bolses de trabayu p’aspirantes a incorporase a la función docente interina. Na xunta, dende SUATEA defendimos la necesidá d’abrir un procesu de negociación integral d’un nuevu alcuerdu. Pa ello, presentemos una filera d’enmiendes que, na nuesa opinión, tendríen de sirvir pa dar cuerpu a una nueva redaición que meyore la estabilidá nel empléu, valorar la esperiencia docente acumulada, la formación pedagóxica adquirida y otros aspeutos que, col modelu d’agora, queden bien lloñe de satisfacer les necesidaes qu’afeuten a les condiciones de trabayu d’un terciu de l’actual plantiya docente asturiana. Esiximos que la negociación non se zarre con esti pequenu cambéu y que s’abra una negociación real d’un nuevu Alcuerdu d’Interinidá más garantista pal profesoráu interín y más beneficiosu pal sistema educativu.
Per otra parte, quueremos destacar que tamos énte un momentu crucial no que cinca al profesoráu interino tres la sentencia del Tribunal de Xusticia de la Unión Europea de 19 de marzu d’anguaño, que, n’aplicación de lo recoyío na directiva UE 1990/70, dictaminó que’l personal interino de les AAPP ta contratao en fraude de llei, que tien d’haber sanción al abusu cometíu, magar-y correspuende a los tribunales y lexislación nacional establecer les midíes de sanción posibles (pola mesma naturaleza de la Directiva Europea, que dexa a elección de cada país les midíes concretes). Efeutivamente, les Alministraciones Educatives tienen qu’establecer midíes pa estabilizar al profesoráu interno contratao en fraude de llei y, dende SUATEA, creemos qu’esta ye la oportunidá pa dar rempuesta a les reivindicaciones del colectivu y esixendo otru Alcuerdu d’interinidá que recueya les nueves realidaes.

Tres esta primer xunta, l’Alministración comprometióse a valorar les propuestes y suxerencies que se fueron presentando a lo llargo de la xunta. Dende SUATEA entendemos que queda abierta la puerta pa un procesu de negociación que nos lleve a la ellaboración d’un nuevu Alcuerdu pal personal interino.

Uviéu/ Uviéu 22
d’ochobre 2020

Esta entrada también está disponible en: Castellanu