Un 1 mayu especial

Esta entrada está disponible en: Castellano (Castellanu)

Si’l pasáu añu la celebración del 1u de Mayu tuvo marcada pola pandemia y el confinamientu, anguaño 2021 caractízase por ser una continuidá del anterior tocántenes a la evolución socio-sanitaria y un afondamientu nel procesu de desmovilización social facilitáu poles midíes de calter restrictivu que llindaron enforma les posibilidaes d’alcuentros pa entamar acciones de calter colectivu.

Nesti contestu, vemos que la imposición de polítiques neolliberales sigue’l so cursu. Asina, tenemos que considerar el caltenimientu de les reformes llaborales de los años 2010 y 2012, roblaes por gobiernos del PSOE y PP respectivamente. Tou un exemplu de la hexemonía ideolóxica de la derecha.

Ente otros aspeutos, dambes reformes contribuyeron a precarizar de forma decisiva les condiciones llaborales nel mundu del trabayu. Coles mires de flexibilizar la regulación llaboral introduciéronse cambeos p’abaratar los despidos, la contratación precaria, l’amenorgamientu de costos salariales, etc. que xeneraron una creciente inseguridá llaboral y un aumentu estremu de les cifres de paru que se xustifiquen cola crisis económica y la pandemia.

El modelu de “Sociedá del bienestar” fai agua perdayures. La política neolliberal d’endelgazar el sector públicu y privatizar llévanos a situaciones como la que nos toca vivir marcada por un fuerte medría de persones vulnerables.

La pandemia valió pa poner nel centru de les nueses esmoliciones la importancia de lluchar pol caltenimientu de los servicios públicos. Sanidá, tresporte, ayuda a dependencia o Educación, de calter públicu y por citar dalgunos, son la garantía de poder atender les necesidaes crecientes que tien plantegada la nuesa sociedá caracterizada por un creciente grau de vulnerabilidá y esclusión social.  Ye posible que’l sistema capitalista nun inventara la pandemia, pero ye responsable de los sos efectos, cuidao que rapiñó, mientres años, ciertes rexones del mundu que se quedaron ensin infraestructures, equipos y personal sanitario. Esi mesmu sistema ye’l que destruyó los servicios públicos ellí onde esistíen.

En realidá tenemos qu’aportunar no evidente y ye que la base mesma del sistema capitalista nun ye satisfaer les necesidaes de la población sinón l’apropiación per parte d’unos pocos de los beneficios del trabayu de la mayoría de la xente.

Caltener el sistema de patentes de les vacunes ye optar por condergar a muerte a millones de persones nel mundu. Les empreses farmacéutiques tienen de poner les sos conocencies al serviciu  la humanidá y non pa beneficiu propiu.

No que nos afecta como docentes, la situación nun ameyora. Dende hai cuantayá aplicáronse importantes retayos nel nuesu campu, llevando a la Escuela Pública a una situación en cantu del colapsu.  Vamos tardar años en recuperanos de les consecuencies de los retayos. La llegada de la pandemia punxo de manifiestu les torgues que tenemos qu’encarar nunes condiciones  bien precaries pola escasez de recursos económicos. SUATEA aportunó dende’l branu de 2020 na necesidá de garantizar la presencialidá del llabor docente y pa ello yera necesario amenorgar ratios d’alumnáu per aula y aumentar el volume de contrataciones de profesoráu pa poder cuntar con una plantiya que pudiera cubrir les nueves necesidaes calteniendo una educación de calidá. L’Alministración nun fixo casu y tomó decisiones que llevaron al conxuntu del profesoráu a una situación marcada pola desregulación absoluta de les condiciones llaborales.

Mientres el personal docente cumplió cola so función d’actividá esencial faciendo frente a les necesidaes surdíes cola pandemia y garantizando’l cumplimientu de la so función educativa consistente en dar  continuidá al procesu d’enseñanza-aprendizaxe de los nuesos menores.

La xornada internacional de llucha de les y los trabayadores del 1 de mayu ye una oportunidá pa recordar la importancia de la solidaridá internacional de la nuesa clase social. Güei, como ayeri, siguimos creyendo necesaria la construcción d’una ferramienta internacional necesaria pa toles fuerces sindicales que reivindiquen y practiquen un sindicalismu anticapitalista, autoxestionariu, democráticu y ecolóxicu, que sía independiente de la patronal  y de los gobiernos, internacionalista y que lluche contra toles formes de opresión (machismu, racismu, homofobia, xenofobia), un sindicalismu que faiga referencia a la democracia obrera y a la autoorganización de los y  les trabayadores.Por too ello, güei más que nunca, 1u de Mayu

Print Friendly, PDF & Email

Esta entrada está disponible en: Castellano (Castellanu)


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4757