Home > Asturianu > Tenemos derechu

Tenemos derechu

Nel Conseyu Escolar de Principáu d’Asturies (CEPA) celebráu’l día 18 de marzu de 2021 SUATEA presentó un escritu escritu n’asturianu. La CONCAPA (Confederación Católica Nacional de Padres de Familia y padres de Alumnos) amosó la so disconformidá col unviu del escritu presentáu por SUATEA  por “recibilu esclusivamente nuna llingua que nun ye’l castellán, llingua oficial y vehicular del nuestru país”, argumentaron. 

Anque l’escritu de SUATEA fue aceptáu, el Presidente de Conseyu Escolar fizo comentarios poco agraciaos referíos al escritu, calificando’l fechu de ser presentáu n’asturianu como una forma d’imposición. 

Quiso l’azar que’l Tribunal Constitucional se pronunciare sobre’l recursu d’inconstitucionalidá plantegáu por Vox contra’l reglamentu de la Xunta Xeneral, onde se reconoz el derechu de toles persones al emplegu del asturianu na cámara asturiana. La sentencia reconoz la plena constitucionalidá de la norma y, polo tanto, el derechu a emplagar l’asturianu nes nuestres instituciones.

Nel siguiente Plenu del CEPA, SUATEA esclarió que nun se pue considerar imposición l’exerciciu d’un derechu. El derechu al emplegu del asturianu va milenta años que mos lu quieren prindar acabando col feble y escasu reconocimientu  llegal col que cuntamos la ciudadanía asturiano a la hora de protexer los nuestros derechos llingüísticos. Sabedores d’ello, los grupos políticos y organizaciones sociales más reaccionarios y minoritarios intenten por tolos medios acabar con ellos. Por desgracia, dalgunes de les persones integrantes de les nuestres instituciones vense contaminaes por estos discursos imperantes históricamente y agora minoritarios. Ye por ello que SUATEA, col envís de reforzar los nuestros derechos llingüísticos, d’avanzar na normalización institucional de les nuestres llingües y torgar enquivocos, va pidir que nos reglamentos de tolos órganos colexaos nos que participa (Conseyos Escolares, Xunta de Personal Docente, Comités de Salú y Seguridá Llaboral…) se reconoza esplícitamente’l derechu de cualisquier persona al usu del asturianu o’l gallego-asturianu.

El Secretriáu de SUATEA

N’Uviéu a 25 e marzu de 2021

Esta entrada también está disponible en: Castellanu