Suspensu a la Conseyería d’Educación

Esta entrada está disponible en: Castellano (Castellanu)

Cuando se pensaba que’l procesu d’oposiciones que “sufrió” el Cuerpu de Maestros nun podía ser peor, güei atopemos con unu más de los milenta errores que la Conseyería cometió:

Dende la convocatoria d’oposiciones realizada “a les carrenderes”, nun sabemos si pa colgase la medaya de ser los primer0s en convocar en tol estáu, que como non, hubo de llevar a una corrección d’errores que supunxo tamién el periodu más llargu de la hestoria pa poder inscribise al procesu col consiguiente “efectu llamada”, hasta anguaño nel que se publiquen unos llistaos de persones opositores aptes con una aplicación de la fase de concursu equivocada.

A esti procesu tien d’añedise’l “maltratu” a los y les componentes de tribunales que tuvieron que dedicar munches hores de formación, unos tiempos afechos que nun dexen ver a toles persones qu’opositen col tiempu abondu, con unes robles que conocen non más de 15 minutos antes de ver a la primer persona aspirante, y que tuvieron que sumar al estrés del fin de cursu (pendientes d’aplicación de nuevos decretos) una cantidá d’hores descomanada al procesu selectivu.

De la mesma manera lleguen les persones opositores a les que la Conseyería trata como númberos, que pon y quita al so antoxu, que ven baillar los sos baremos incorrectos una y otra vez, que tienen de realizar alegaciones cuando realmente tienen que tar centraes nun procesu tan duru y qu’amás  ven en dellos casos cambeos nes places asignaes por tribunales que se mueven d’un llau a otru ensin muncho fundamentu y que podríen solucionase de forma cenciella con una nota de corrección d’errores publicada n’Educastur.

Pero esi paez que nun ye l’estilu de la Conseyería, el rectificar errores y salir a dar la cara pidiendo esculpes, tal que acaba d’asoceder cola publicación de les llistes definitives del procesu selectivu.

Esiximos a la Conseyería que tome les midíes oportunes pa que tal cúmulu de despropósitos nun vuelva asoceder, qu’escuche y acepte dalgunes de les múltiples propuestes qu’añu tres añu dende SUATEA se presenten al entamu del procesu p’ameyorar el procesu selectivu.

Creemos necesario que la Conseyera de les esplicaciones pertinentes y pida disculpes a toles persones que se vieron afectaes por esti desastrosu procesu. Esíxenmos unes competencies y saberes que paecen inesistentes na nuesa mesma Conseyería, en definitiva la Conseyería d’Educación nun supera’l 25%.

Print Friendly, PDF & Email

Esta entrada está disponible en: Castellano (Castellanu)