SUATEA pide otru procesu de negociación sobre condiciones llaborales

SUATEA ESIXE QUE S’ENTAME OTRU PROCESU DE NEGOCIACIÓN SOBRE CONDICIONES LLABORALES DEL PROFESORÁU

L’intentu d’alcuerdu afaláu pola Alministración educativa pa regular la xornada llaboral del profesoráu asturianu foi un fracasu. Esta situación ye frutu d’una posición ríxida per parte de la Conseyería, que se niega sistemáticamente a empecipiar un procesu de negociación qu’encete’l conxuntu de les reivindicaciones sindicales p’ameyorar les condiciones llaborales del profesoráu.

Dende SUATEA consideramos qu’acabar colos retayos aplicaos tres el RD14/2012, ye un clamor en Secundaria, yá que supunxo un deterioru insostenible que la educación pública nun merez siguir sufriendo. Esti alcuerdu suponía garantizar pal cursu que vien la vuelta a la xornada llectiva previa a la crisis, nesi sentíu asumimos que teníemos una responsabilidá enorme y que’l profesoráu esperaba que sofitáramos esta propuesta tan lluchada y reivindicada dende va años.

Sicasí, pa SUATEA, esti alcuerdu yera insatisfactoriu y asina lo fiximos constar na Mesa de negociación, cuidao que recoyía solo una parte de les reivindicaciones que’l profesoráu reclama. Na Educación Primaria, l’incumplimientu del Alcuerdu de Plantiyes aumentó na práctica’l pesu de l’atención docente directa, polo que ye imprescindible amenorgar la xornada llectiva pal cuerpu de Maestros asina como negociar otros munchos aspeutos qu’incidan nunes meyores condiciones llaborales. La propuesta del alcuerdu que recalifica dos hores complementaries pa faceles de cómputu mensual nun s’averaba a les necesidaes reales del colectivu nin a les sos reivindicaciones.

Magar too esto, dende SUATEA considerábemos que la propuesta de la Conseyería yera un puntu de partida pa romper cola rixidez y la falta de diálogu que nos lleven imponiendo dende va años. L’establecimientu d’una Comisión de siguimientu del alcuerdu, si ésti fuera aprobáu, podría ser l’espaciu pa siguir primiendo na conquista de más meyores y nesti sentíu nun queríemos tar al marxe. El nuesu oxetivu yera treslladar toles reivindicaciones pendientes a esa Comisión de siguimientu.

Llegaos a esti puntu, en SUATEA consideramos que l’Alministración tien la obligación de reconsiderar la so propuesta y abrir un procesu de negociación real, que parta del mínimu ufiertáu nesta infructuosa ronda y que trate l’amenorgamientu de les hores llectives en tolos cuerpos y amás ameyore otros aspeutos de les condiciones llaborales del profesoráu.

Esperamos qu’esti intentu fallíu de l’Alministración nun sía emplegáu como sida pa siguir calteniendo la situación actual. La Conseyería nun cuntó con naide pa imponer el retayu y nun precisa más que de voluntá política pa revertilu.

Uviéu, 20 de setiembre de 2018