Home > Comunicaos > SUATEA y STEs-i piden al Gobiernu proteición del personal más vulnerable al COVID

SUATEA y STEs-i piden al Gobiernu proteición del personal más vulnerable al COVID

SUATEA y los STEs-i piden a los Ministerios de Educación y de Sanidá qu’actúen pa evitar poner en riesgu la salú del personal de centros educativos que seya especialmente vulnerable al COVID-19

La mayoría d’aries de salú de les distintes comunidaes establecen el Nivel de Riesgu 1 (NR1) según un criteriu erróneu de mano, “el trabayu ensin contactu con persones sintomátiques”, porque contradiz tola evidencia científica, pos resalva la posibilidá más que probable nun centru educativu d’establecer contautu con persones asintomátiques.

Dende SUATEA y los STES-i, entendemos que l’aria de prevención de riesgos llaborales ye competencia territorial, pero tamién queremos dexar constancia énte’l Ministeriu de la falta de precisión na catalogación del nivel de riesgu del personal educativo y el peligru al que se va ver espuestu’l profesoráu.

El dictaminar el Nivel de Riesgu 1 esclúi, de facto, que s’afaye per parte l’Alministración cualquier midida empobinada a l’adautación del puestu de trabayu o la entrega d’equipos de proteición al personal docente, cualesquier que seya la circunstancia o patoloxía y la posibilidá de que tea o nun tea controlada, polo qu’entendemos qu’esta situación constitúi un exerciciu pergrande d’irresponsabilidá per parte les Alministraciones educatives, poniendo en riesgu pergrave la salú personal y la de les sos families.

Per otru llau, duldamos de qu’estes actuaciones tean cumpliendo cola LPRL, porque los puestos de trabayu del personal que solicitó la evaluación nun fueron evaluaos in situ pol personal téunicu, por cuenta de les diferencies vultables qu’esisten ente les aules, non namás dientro d’un mesmu centru, sinón tamién nel conxuntu del territoriu. Polo tanto, nun paez fayadizo dictar resolvimientos ensin tener en cuenta la realidá del puestu.

Por too ello, y considerando qu’esta casuística ta repitiéndose na mayoría los territorios y que tien repercusiones sobre la salú del profesoráu que tien estos dictámenes, dende SUATEA y los STEs-i, en respeutives cartes a la Ministra d’Educación y al Ministru de Sanidá, pidimos que s’encamiente a les Alministraciones territoriales a realizar una evaluación sistemática, completa y real de caúna de les persones solicitantes, siempres según criterios amañosos dende un puntu vista científicu, y tamién al cumplimientu de los requerimientos llegales de la Llei de Prevención de Riesgos Llaborales y del RD 39/1997, pol que s’aprueba’l Reglamentu de los Servicios de Prevención, en materia d’evaluación de los riesgos nel trabayu. Amás, solicitemos que s’esixa al Ministeriu de Sanidá que, con calter d’urxencia, revise los criterios establecíos nel documentu oxetu d’esti escritu (PROCEDIMIENTO DE ACTUACIÓN PARA LOS SERVICIOS DE PREVENCIÓN DE RIESGOS LABORALES FRENTE A LA EXPOSICIÓN AL SARS-CoV-2) nos términos señalaos, col enfotu d’iguar una situación que ta provocando que dende les Alministraciones educatives nun se tomen les midíes oportunes pa la protección de los y les trabayadores, poniendo asina en grave peligru la so salú, ya inclusive la so vida y la de les sos families.

Uvieu 11 de septiembre de 2021

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4348