Home > Comunicaos > SUATEA y los STES-i pola equiparación na xubilación anticipada

SUATEA y los STES-i pola equiparación na xubilación anticipada

SUATEA Y LOS STES-I RECLAMEN L’ACCESU A LA XUBILACIÓN ANTICIPADA PAL PROFESORÁU QUE PERTENEZ AL RÉXIME XENERAL DE LA SEGURIDÁ SOCIAL

L’añu pasáu, la Confederación de STEs-i tuvo una xunta billateral cola Direutora Xeneral de la Seguridá Social, Mª Gloria Redondo Rincón, pa espone-y les diferencies nel accesu a la xubilación del personal docente de la enseñanza pública y esixi-y acabar cola discriminación esistente ente coleutivos de característiques asemeyaes.  

Nel Estáu español hai dos modalidaes de xubilación del personal funcionario: per una parte, el personal incluyíu nel Réxime de Clases Pasives del Estáu, nel que ta incluyío’l personal funcionario de carrera qu’ingresó na función pública en fecha anterior al 1 de xineru de 2011;  per otra, el personal integrao nel Réxime Xeneral de la Seguridá Social, esto ye, el personal interino y el personal funcionario qu’entró dempués de 2011. 

Nel casu del personal funcionario del Réxime de Clases Pasives, p’aportar a la xubilación voluntaria, esíxese tener cumplíos 60 años d’edá y reconocíos trenta años de servicios efeutivos. Sicasí, el personal que pertenez al Réxime Xeneral de la Seguridá Social apuerta a la xubilación en condiciones muncho más estrictes, porque de forma escalonada va llegar a la xubilación a los 67 años en 2027  (na actualidá, 65 y 10 meses) y , en casu de xubilación anticipada, ríquese tener cumplida una edá que nun sía inferior en dos años, tolo más, a la edá esixida en cada casu y acreditar un periodu mínimu de cotización efeutiva de trenta y cinco años, aplicando un coeficiente reductor ente’l 1,625% y el 2% por trimestre según los años cotizaos.

Estes importantes diferencies na xubilación anticipada ente dambos rexímenes llevaron a incluyir la Disposición adicional quinta nel Real decretu lexislativu 5/2015, de 30 d’ochobre, pol que s’aprueba el Testu refundíu de la Llei del Estatutu Básicu del Emplegáu Públicu (nos mesmos términos de la disposición adicional sesta de la redaición inicial del EBEP -Llei 7/2007) na que s’indicaba: “El gobiernu presentará nel Congresu de los Diputaos un estudiu sobre los distintos rexímenes d’accesu a la xubilación de los funcionarios que contenga, ente otros aspeutos, encamientos p’asegurar la non discriminación ente coleutivos con carauterístiques similares y la conveniencia d’ampliar la posibilidá d’aportar a la xubilación antemanada de determinaos colectivos“. Trescurrieron trelce años d’esta Disposición y los distintos gobiernos nun encetaron  los términos incluyíos nella. Amás, nel añu 2017, el Defensor del Pueblu emitió un Encamientu al Ministeriu de Facienda y Función Pública pa que se dea cumplimientu a la Disposición incluyida nel EBEP.

Dende los STES-i, siguimos demandando que ye menester correxir estos desaxustes por suponer una evidente discriminación ente coleutivos y polos importantes riesgos llaborales qu’afeuten al coleutivu. Por ello, amás d’una nueva solicitú d’entrevista cola Directora de Seguridá Social p’avanzar nes nueses propuestes, acabamos d’unvia-yos un refechu informe de salú llaboral y riesgos llaborales nel sector docente, un informe que pretende demostrar con datos que’l trabayu que se desenvuelve na enseñanza tien una especificidá y una complexidá qu’esixen encetar con responsabilidá l’accesu a la xubilación anticipada de los coleutivos que pertenecen al Réxime Xeneral de la Seguridá Social. El llabor docente acarreta unos efeutos adversos na salú del profesoráu, tal como ta reconocío y avalao por dellos estudios y persones espertes na materia. El personal docente ye un coleutivu que carez gran diversidá de riesgos llaborales: amás de los psicosociales, que se deben en bona parte a les carauterístiques del oficiu, hai otros como los ergonómicos o los físicos que tamién son especialmente importantes. L’estrés, l’ansiedá y la depresión ocupen los primeros puestos na llista d’enfermedaes que causen baxa llaboral ente los docentes.

Certifíquenlo asina los datos recoyíos por distintos informes del Conseyu Escolar del Estáu, qu’aseguren que les alteraciones psíquiques son les que provoquen más baxes llargues ente’l profesoráu: «La sobrecarga nerviosa derivada del propiu llabor docente, les deceiciones y frustraciones de les condiciones de trabayu esistentes,  l’estrés en delles dómines del cursu… inflúin de manera decisiva en munches de les alteraciones psíquiques», ya indícase que: «éstes lleguen a producir depresiones, que causen un altu índiz de ausentismu ente los profesionales de la enseñanza».

Dende la Confederación de STEs-i, nun vamos cesar nel empeñu y vamos siguir lluchando con tolos medios que tengamos p’acabar cola desigualdá y discriminación qu’afeuta al profesoráu interín y al qu’ingresó na Función Pública a partir de 2011. Vamos esixir que se tengan en cuenta los riesgos llaborales inherentes al sector educativu y que dambos coleutivos apuerten a la xubilación voluntaria o antemanada nes mesmes condiciones que’l profesoráu personal funcionariu que pertenez al Réxime de Clases Pasives.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344