SUATEA y los demás sindicatos refuguen el nuevu billingüe: Programa HabLE

Esta entrada está disponible en: Castellano (Castellanu)

La Conseyería d’Educación llevó a mesa sectorial la negociación del nuevu programa billingüe (qu’agora llamase programa HabLE, asumiéndose, por fin, que lo de billingüe yera una pretenciosa falsedá), alcontrándose col refugu de les organizaciones sindicales: además de SUATEA, votaron tamién en contra CC.OO. y UGT, y abstúvose ANPE. Nun hubo nengún votu a favor de la propuesta de la Conseyería, sicasí, siguirá’l tramite pa la so aprobación, ensín acuerdu cola parte sindical.

Dende SUATEA denunciamos los efeutos perniciosos d’esti programa: segregación, amenorgamientu de la calidá educativa por dificultase l’accesu a los conteníos, asina como una división del profesoráu en clases, que perpetúase por un sistema perversu que define perfiles específicos billingües pa les places nel concursu de tresllaos y nes peticiones del réxime de interinidá. Agora, el problema agrávase al apaecer un «segundu tramu» denomináu HabLE+, que aumentará la tristemente ya existente competencia entre los centros educativos pol alumnáu. Endurecense, además, les condiciones pa impartir estes enseñances, siendo necesariu el C1 de la llingua estranxera que correspuenda.

Les fuercies sindicales qu’ellí tuvimos presentes denunciamos, además, la poca disposición por parte de l’alministración a negociar: el borrador que se mos mandó pal estudiu fue modificáu, y entregósenos la modificación al entamu mesmu de la reunión, la Conseyería anunció una presentación del programa xusto dempués de la mesa sectorial, colo que nun paez que cuntara con que podía sufrir nenguna modificación de caláu.

El Secretariáu de SUATEA

N’Uviéu a 29 de marzu de 2023

Print Friendly, PDF & Email

Esta entrada está disponible en: Castellano (Castellanu)