SUATEA y Confederación Intersindical pola estabilización del personal temporal

SUATEA la Confederación Intersindical y la Confederación de STEs-i movilícense pa esixir al Gobiernu soluciones inmediates pal Personal temporal ya interino en toles Alministraciones Públiques.

Nes últimes décades, la precariedá llaboral xeneralizóse nel mercáu llaboral español, pero son les Alministraciones Públiques les que contribuyeron a la precarización llaboral per aciu de la contratación temporal. A lo llargo de décades, utilizaron la contratación de personal eventual pa cubrir vacantes permanentes y estructurales, en llugar de facelo pa resolver cuestiones puntuales o de calter urxente, como asina indica la normativa.

Nos últimos meses, tres la sentencia del Tribunal de Xusticia de la Unión Europea del 19 de marzu de 2020, el personal temporal ya interino de les AAPP vio reconocío lo que dende va años vien denunciándose per parte de la Confederación Intersindical y los STEs-i: les Alministraciones Públiques abusaron de la contratación temporal.

La mentada sentencia del Tribunal de Xusticia de la Unión Europea, en base a la Directiva UE 1999/70, reconoz qu’hubo abusu de temporalidá na contratación del personal eventual ya interino del sector públicu. Alvierte que nin los procesos selectivos de llibre concurrencia, nin el tresformamientu del personal temporal o interino en “indefinío non fixo” son la solución porque nenguna d’estes midíes garantiza la proteición del personal que sufrió abusu de la temporalidá. Tamién dexa en claro que los procesos d’estabilización resultantes de los dos Alcuerdos a nivel estatal de 2017 y 2018 (soscritos por CCOO, UGT y CISF) nun son sanción al abusu de la contratación temporal.

Nel últimu trimestre de 2020, viniéronse presentando distintes iniciatives parlamentaries, tanto nel Congresu de los Diputaos y Senáu como en dellos Parlamentos autonómicos (Cataluña, País Vascu, Canaries). Nunes encamiéntase a entamar acciones normatives pa promover l’afitamientu alministrativu d’esti personal emplegáu públicu en fraude de Llei al traviés de la reforma del EBEP; n’otres, propónse un cambéu de la lexislación básica pa establecer un turnu acutáu d’accesu.

Dende SUATEA, la Confederación Intersindical y los STEs-i, esiximos que, de forma urxente, se busque una solución pa tol personal del sector públicu que tuvo contratao en fraude de Llei y que foi víctima de les polítiques de contratación errónees y abusives que se llevaron a cabu por décades

Pa ello, ye menester que de forma urxente se pongan en marcha iniciatives normatives o lexislatives  qu’eviten los efeutos negativos que pa esti colectivu tienen les ufiertes estraordinaries d’estabilización del empléu convocaes a partir del Alcuerdu pa la Meyora del Empléu Públicu robláu pol Partíu Popular y los sindicatos CCOO, CSI-F y UGT en 2017. Porque, como dexó meridianamente claro’l TJUE, nin suponen una sanción pa les Alministraciones incumplidores de les normes europees, nin menos tovía constitúin un mecanismu de compensación pal personal oxetu  del abusu de la temporalidá.

A lo último, estremando ente les midíes que tengan de resolver el problema de l’alta tasa de temporalidá actual y aquelles que tengan una finalidá preventiva, tendrán que s’inxertar nel Estatutu Básicu del Emplegáu Públicu cambeos que recueyan mecanismos efeuivos de sanción pa les Alministraciones Públiques incumplidores. Si se dan estes condiciones, la SUATEA y Confederación Intersindical van tar dispuestos a emprestar la so collaboración y sofitu; pero, si nun ye asina, nun vamos duldar en poner los medios necesarios al nuesu algame pa que se cumpla la máxima d’amenorgar la temporalidá consolidando a les persones oxetu de fraude de llei ensin que naide quede p’atrás en camín.

Mientres nun se dea una solución, qu’entendemos que nun puede ser otra que la estabilidá, afitamientu o cualesquier otra figura que reconoza la fixeza y que suponga una sanción al abusu de temporalidá, dende SUATEA, la Confederación Intersindical y los STEs-i vamos echar alantre una campaña de movilizaciones al pie d’otres organizaciones que se sumen, amás de sofitar delles movilizaciones puestes en marcha por distintos coleutivos y plataformes de personal temporal ya interino y, más en concreto, percorríos en caravanes de coches el próximu domingu 31 de xineru per munches ciudades del estáu. Porque llegó yá la hora de que se dea una solución a la contratación irregular nes Alministraciones Públiques.´

SUATEA y  la Confederación Intersindical