SUATEA y Confederación Intersindical apoyen el llabor del personal docente en pandemia

SUATEA y la Confederación Intersindical apoyen el llabor del personal docente y non docente nun cursu nel que les alministraciones nun vienen tando a l’altura

Otru cursu más tamos teniendo qu’enfrentamos en condiciones precaries a una situación anómala y ensin los medios afayadizos 

Dende SUATEA y la Confederación Intersindical queremos facer llegar la nuesa reconocencia al profesoráu y tol personal de los centros educativos. Dende l’empiezu la pandemia demostraron la so profesionalidá sacando alantre un cursu educativu que de sópitu pierde la so organización habitual (la presencialidá) siendo sustituyida pola formación a distancia, col entueyu añadíu de falta de previsión, de dotación de medios y en dellos casos de falta de formación. Pero otra vuelta’l personal docente demostró la so capacidá d’adautación y la so responsabilidá pa realizar el so trabayu, utilizando los medios personales, trabayando a deshora, camudando programaciones, metodoloxíes, formes d’accesu a la información, etc. y too ello pa consiguir llegar a tol alumnáu. Énte esti esfuerzu, que tenemos d’estimar abondo, sacaron alantre’l cursu. La voluntá por nun dexar a dengún neñu o neña ensin atención foi impresionante y, gracies a la implicación del profesoráu, superóse un cursu que poduera ser un fracasu si too dependiera namás de les soluciones propuestes dende les alministraciones.

Entamemos cursu escolar nuevu, la pandemia yá nun ye una novedá y otra vuelta’l profesoráu y tol personal de los centros s’atopen énte aules masifices, falta de material de proteición individual, ausencia de protocolu énte’l profesoráu sensible. Les alministraciones otra vez ficieron desdexación de les sos responsabilidaes y permitieron la incorporación de tola comunidá educativa ensin prever que la pandemia diba siguir ehí y que se debíen de tomar midíes estraordinaries. Un empiezu de cursu caóticu que otra vuelta gracies a la profesionalidá de docentes y personal non docente permitió l’empiezu de cursu con cierta normalidá.

El profesoráu nun ye considerao personal de riesgu, pero tán 5 o 6 hores col mázcaru quirúrxicu (les alministraciones nun apurren les FFP2, nin dan les partíes presupuestaries necesaries paor que’l centru les suministre), n’espacios pequeños (caltiénense ventanes y puertes abiertes pa que nun haya contaxu por aerosoles, cola consiguiente baxada de temperatura, unos 4 graos en delles aules) y con 20 persones mínimu. Pero a pesar de los contaxos, a pesar de lo incómodo de trabayar con temperatures perbaxes, a pesar de la desidia de les alministraciones, el profesoráu ta cumpliendo coles sos responsabilidaes.

Por too ello, dende SUATEA y la Confederación Intersindical de la que formamos parte, queremos amosar el nuesu fondu agradecimientu pol llabor desenvuelta pol profesoráu en tolos niveles educativos. Igualmente, faemos estensivu esta reconocencia a quien contribúin col so trabayu al caltenimientu de l’actividá escolar como ye’l personal alministrativo, bedeles, serviciu de llimpieza y caltenimientu de los centros, tresporte escolar y demás.

Esti trabayu conxuntu ta permitiendo que los nuesos menores n’edá escolar tean recibiendo la formación que precisen. Llamentamos qu’en Asturies, la Conseyería d’Educación caltenga a dellos miles d’alumnos y alumnes nuna situación de semipresencialidá, frayando’l so derechu a recibir una educación en condiciones. P’acabar, la nuesa reconocencia tamién a la inmensa mayoría d’alumnáu que ta encarando esta estraña situación que-yos toca vivir dando exemplu de responsabilidá y madurez pa contribuyir, d’esa manera, a desenvolver el trabayu docente col mayor grau normalidá que pue algamar nesta fase tan estraordinaria.

Print Friendly, PDF & Email