Home > Profesoráu > Profesoráu interín > SUATEA y CCOO convoquen movilizaciones pola estabilidad del profesoráu interín

SUATEA y CCOO convoquen movilizaciones pola estabilidad del profesoráu interín

Semeyes de la concentración

L’alcuerdu que va regular la ellaboración de les llistes d’aspirantes a interinidá n’Asturies sigue provocando’l refugu del colectivu interín asturianu. Como yá manifestamos nel so día, SUATEA y FE-CCOO siguimos oponiéndonos a lo que pensamos ye un retrocesu nes condiciones llaborales d’esti profesoráu. La esperiencia docente ve amenorgáu’l so pesu a favor de la nota d’oposición quedando anulaos derechos que taben adquiríos y que son reconocíos pa los trabayadores d’otres estayes llaborales. Perdióse tamién la oportunidá d’establecer midíes que protexan a los profesores d’Asturies al igual qu’asocede nel restu d’alministraciones educatives.

Al traviés de les movilizaciones consiguióse que l’amenaza d’un resolvimientu unillateral y tremendamente agresivu per parte de la Conseyería nun saliera alantre. Consideramos que sigue siendo necesaria la denuncia na cai y reivindicar la defensa de la estabilidá de los docentes interinos, non solo por xusticia sinón tamién pola implicación que tien pal mesmu sistema educativu. La precariedá va en contra de la calidá y, nun contestu xeneral de retayos, la defensa de la situación del profesoráu supón evitar un progresivu deterioru d’un serviciu públicu fundamental como ye l’educativu.

Otru elementu más de la política que se ta aplicando contra’l colectivu interín vese nes condiciones nes que se produz la ufierta d’empléu públicu d’anguaño. L’alministración empeñase na execución de la oposición cuando yá se confirmó la non convocatoria nel restu de CCAA. La normativa permite l’aplazamientu hasta tres años y amás hai precedentes d’ello. Esta constitúi otra de les reivindicaciones en defensa de la dignidá y contra la precariedá d’esti profesoráu.

Pola estabilidá d’interinos ya interines

Contra l’actual alcuerdu que regula les llistes

Y pol aplazamientu na execución de les oposiciones

CONCENTRACIÓN el martes 29 d’abril a les 18:00 na Plaza d’España delatre la Conseyería d’Educación

 

Esta entrada tamién se puede consultar en: Castellanu