Home > Aición sindical > SUATEA volvi ganar les elecciones sindicales nel Enseñu Públicu Asturianu

SUATEA volvi ganar les elecciones sindicales nel Enseñu Públicu Asturianu

Emma FaustinoViendo’l resultáu de les últimes elecciones sindicales ente’l profesoráu asturianu desde SUATEA queremos manifestar lo que vien darréu:

  • Lo primero, la nuestra satisfacción por volver ganar. Agradecemos la confianza de los y les docentes que depositaron nel nuestru sindicato, y comprometémosmos a continuar cola nuestra linea sindical de llucha en defensa de la educación pública.
  • Ye la tercer vez seguida que ganamos a pesar de cuntar con recursos económicos llimitaos, especialmente si nos comparamos con otres organizaciones sindicales. Por ello tienen un valor especial toles colaboraciones personales que contribuyeron a difundir les nuestres propuestes y permitimos facer una campaña visitando los centros educativos y debatiendo col restu de compañeros docentes.
  • El futuru nun vien con aire favorable pa los servicios públicos en general nin pa la educación en particular, ye por ello que los nuestros esfuercios van dir dirixíos fundamentalmente a denunciar les agresiones que dende’l gobiernu estatal o autonómicu pretendan facer retroceder esti servicio públicu de primer orde.
  • Va ser una prioridá lluchar por meyorar les condiciones llaborales del profesoráu y nello vense implicaos muchos aspectos; d’un llau los referentes a les condiciones en que se desenvuelve la docencia como son les les ratios d’alumnáu o les hores llectives, d’otru les relacionaes coles retribuciones que fueron menguando nos postreros cursos axuntando nel casu asturianu’l gravamen de ser una una de les comunidaes autónomes nes que menos se gana. Nesti sentíu también vamos lluchar pola homologación salarial, desaniciando les desigualdaes qu’anguaño se dan al nun cobrar lo mesmo profesionales que desenrollen la mesma xera.
  • Otra de les prioridaes va ser la de frenar la sangría nes plantiyes y el pieslle de les unidaes en dellos centros mientres se mantienen los conciertos educativos en porgüeyu d’entidaes privaes a costa del erariu públicu.
  • Rellacionao col mantenimientu de les plantiyes alcuéntrase la necesidá de defender la estabilidá pal colectivu d’interinos que lleven años trabayando en condiciones de precariedá, con medies xornaes y dures itinerancies, en desigualdá de condiciones con respectu a otres comunidaes autónomes y ensin posibilidá d’acceder a una plaza pola ausencia de convocatoria d’emplegu públicu.
  • La defensa de la especialidá d’asturianu va ser otra de les nuestres prioridaes.
  • En definitiva, ábresenos un futuru que va esixir un gran compromisu de llucha y resistencia, a la implantación de la LOMCE y a futuros decretos como’l d’especialidaes pa secundaria. Esta ye, foi y va ser el compromisu y la coherencia de SUATEA.

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 3778