SUATEA va defender l’afitamientu del empléu del personal interino

Esta entrada está disponible en: Castellano (Castellanu)

Tres la xunta celebrada güei ente la Dirección Xeneral de Función Pública y les OOSS pa informar sobre l’Alcuerdu estatal pola meyora del empléu públicu”, dende SUATEA queremos faer les siguientes valoraciones:

1-            Tamos ante un alcuerdu que busca l’amenorgamientu de les tases d’interinidá en tola función pública, pero pa nada s’esmolez  pola estabilización de los emplegaos y emplegaes que lleven ocupando de forma precaria esos puestos de trabayu, dende va munchos años y ensin nenguna posibilidá d’aportar a la condición de funcionarios.

2-            Cuidao que nun hubo ufiertes d’empléu públicu significatives dende va décades, consideramos indispensable que l’Alministración demuestre un mínimu de sensibilidá ante la posibilidá de qu’esti procesu suponga’l despidu de miles de persones qu’anguaño tán n’activu.

3-            Nel ámbitu educativu, poles especifidaes que tien, consideramos indispensable abrir un procesu de negociación nel marcu de la Mesa Sectorial del MECD que traiga una serie de midíes (tanto nel concursu como nel modelu d’oposición) que sirvan realmente pa consolidar al profesoráu interino nos puestos de trabayu que desempeña.

4-            Na nuesa Comunidá, vamos esixir, dientro de la negociación que se van llevar a cabu na Mesa Sectorial, la necesidá de permediar les ufiertes d’empléu públicu nos distintos cuerpos docentes asina como coordinar la execución de les mesmes ente los distintos territorios.

Tamos delantre un Alcuerdu qu’ignora la necesaria estabilización del personal interino. Ye absolutamente necesario qu’esto se tenga en cuenta y se corrixa nes respectives negociaciones o, de lo contrario, va derivar en despidos masivos en tola función pública.

El Secretariáu de SUATEA

Uviéu, 5 d’abril de 2017

Print Friendly, PDF & Email

Esta entrada está disponible en: Castellano (Castellanu)