SUATEA solicita un calendariu de negociación al conseyeru

Esta entrada está disponible en: Castellano (Castellanu)

PRIORIDAES DE SUATEA NEL ENTAMU DE CURSU

Darréu volvemos a dici-y al Sr. Conseyeru la necesidá imperiosa d’establecer un calendariu de negociación cola fin de tratar a lo menos estos asuntos::

 Meyorar les condiciones llaborales. Recuperando la xornada anterior al afitamientu de les 20 hores, les condiciones salariales pa compensar la perda de poder adquisitivu d’estos últimos años y l’ampliación y estabilidá de la plantiya. Según un estudio de SUATEA los datos meten mieu:
 Xubilaciones nos próximos 4 años: 2.809
 Places cubiertes anguaño por profesoráu interin: 2.858
 En 4 años vamos atopanos con 5.667 places que nun tendríen un funcionariu de carrera como titular. Esto supón el 52% de interinidá na plantiya.
 Va facer falta convocar oposiciones pa, polo menos, 1000 places al añu los próximos 4 años pa ponese asina nuna tasa d’interinidá del 16%.
• La estructuración y xestión de les escueles infantiles de 0 a 3 años, la so integración nel sistema públicu, dependiente de la conseyería y la instauración de la parexa educativa
• La negociación d’un nuevu acuerdu d’interinos, que contemple tola normativa vixente y torne la esclusión de más docentes de les llistes d’interinidá.
• Les ayudes pa la compra de llibros y material escolar. Que s’impunxo cola oposición manifiesta de parte de la comunidá escolar y énte la so resolución la Xunta de Personal fixo un recursu de reposición.
• Les estratexes tocantes a la materia de salú escolar, lo que, en plan casero, llamóse a finales del cursu pasáu “medicamentazu” y que foron tamién impuestes ensin nenguna negociación colos sindicatos
• La especialidá de llingua asturiana, coles implicaciones qu’ello trae pal profesorado y les sos posibilidaes d’estabilidá llaboral
• Y el debate pendiente, comprometíu pol equipu anterior p’afitar un nuevu calendariu escolar, que se presentó esta primavera y tuvo abondo consensu ente la comunidá educativa. Basáu en criterios pedagóxicos y acuriosando’l periodu llectivu en tramos más curtios que los trimestres actuales.

Respecto a los principales problemes detectaos esti entamu de cursu y que van afectar a los centros cuando s’incorpore l’alumnáu a les clases:

• Xubilaciones y vacantes por comisiones de serviciu que nun s’ufiertaron na primer convocatoria. Tamién detectamos la falta de tutores/as de Primaria.
• Aplicación de la LOMCE en Secundaria y Bachilleratu:

– Trabayu asgaya pa ellaborar programaciones adaptaes al nuevu currículu: nun contestu de precariedá llaboral coles medies xornaes y les 20 hores.
– Dan de plazu 2 trimestres pa facer eses programaciones, lo cualo trae otru problema: nun se conoz cuálos van ser los conteníos mínimos p’algamar los criterios d’evaluación y calificación. Estes informaciones ye preciso dales al alumnáu al empiece del cursu.
– Repetidores de 1º de Bachilleratu: Enantes repetíen con namás 3 o 4 asignatures. Esto la LOMCE nun lo contempla, ¿oblígaráse a repetir el cursu completu?
– Reválides de 6º de Primaria: facemos un llamáu a les families a que nun lleven a los fíos y fíes a facer de les pruebes. Nun tien repercusiones p’acceder a secundaria, nun ye llave ni quita de titular. Tamién refugamos la reválida de 3º.

Print Friendly, PDF & Email

Esta entrada está disponible en: Castellano (Castellanu)