Home > Centros educativos > SUATEA refuga’l zarru d’unidaes na enseñanza pública

SUATEA refuga’l zarru d’unidaes na enseñanza pública

SUATEA REFUGA EL VERGONZOSU ANUNCIU DE ZARRU D’UNIDAES NA ENSEÑANZA PÚBLICA Y ESIXE RESPETU A LA SO COMUNIDÁ EDUCATIVA

L’anunciu per parte del Conseyeru d’Educación Genaro Alonso del zarru de 44 unidaes en centros públicos supón un verdaderu mazazu a la comunidá educativa de la escuela pública.

Anunciar el zarru d’unidaes n’infantil y primaria pal cursu próximu, nesti momentu nel que la Conseyería desconoz los pidimientos de matrícula nos centros públicos, representa una declaración d’intenciones contra la rede pública a la que’l so gobiernu tendría de protexer y curiar.

Esti zarru anunciáu forma parte d’un plan orquestáu pa dir desmantelando la enseñanza pública emplegando como sida la baxada de la natalidá. La opción política d’esti gobiernu nun ye la d’ameyorar la calidá de la enseñanza pública amenorgando ratios y desdoblando les unidaes que nestos momentos superen el númberu d’alumnes y alumnos per aula, según datos facilitaos pola mesma Conseyería d’Educación: la política que ta desenvolviendo’l gobiernu asturianu ye la d’enllantar un nuevu mapa escolar al marxe de los sindicatos d’enseñanza y del parlamentu, una actuación unillateral en contra de la escuela Pública.  Zarrar aules n’educación infantil amás tien un efectu dominó que va traer la supresión de llínees completes al curtiu plazu.

La obligación del gobiernu ye la de garantizar unos servicios públicos de calidá y compensar les desigualdaes sociales qu’empobinen a bona parte de la nuesa infancia a la probeza y el fracasu escolar. En cuenta de faelo, opten por caltener subvencionaos centros privaos inclusive a los qu’incumplen les ratios marcaes pola mesma Conseyería o los que segreguen al alumnáu per sexos.

Lo que ye incomprensible ye que, si la rede pública cuenta con aules abiertes, el gobiernu que tendría de velar pol bien común y pol erariu públicu prefiera marafundiar el dineru de toos y toes en favorecer negocios privaos.

Uviéu, 7 d’abril de 2017

Esta entrada tamién se puede consultar en: Castellanu