SUATEA refuga’l desallugu efectivu de La Madreña

Esta entrada está disponible en: Castellano (Castellanu)

Dende SUATEA queremos amosar el nuesu refugu a la execución de la orde de desallugu de La Madreña, con nocturnidá, como nun podía ser d’otra manera dao’l calter de quien nos gobierna.

Sobre les 6.30 de la mañana personóse la Policía na CSOA La Madreña pa convertir en realidá daqué que munchos y munches oponíamosnos a que llegara. Les persones que pernoctaben ellí faciendo guardia, como se lleva faciendo dende va díes, fueron sacaes pola Policía. La so resistencia pacífica durante’l desallugu, paez ser que nun foi totalmente correspondida polos representantes de les fuerces de seguridá que llegaron a baltalos nel suelu y inclusive a abofetear a unu de los activistes.

La Madreña consiguió movilizar a gran parte de la sociedá uvieína y asturiana como se demostró va una selmana nuna manifestación que xuntó a miles de persones, nel so sofitu y el de les sos actividaes.

Les distintes maneres de represión nun van consiguir apagar l’espíritu de La Madreña nin tampoco nos fadrán arrenunciar a quien pensamos qu’otra manera d’organización y xestión son posibles. Dende SUATEA animamos a tola sociedá asturiana a amosar el sofitu a La Madreña y a les sos actividaes, asina como a refugar la represión na manifestación que va facese güei 3 de xunu a les 19:00 hores dende la Madreña.

El Secretariáu de SUATEA

Uviéu, 3 de xunu de 2014

Print Friendly, PDF & Email

Esta entrada está disponible en: Castellano (Castellanu)