Home > Comunicaos > SUATEA refuga la propuesta final de plantiyes

SUATEA refuga la propuesta final de plantiyes

Celebróse a les 10h. de güei la última mesa de negociación de plantiyes orgániques ente la Conseyería Educación y les organizaciones sindicales. SUATEA refugó esta propuesta porque nun respuende a toles necesidaes reales del nuestru sistema educativu y nun avancen significativamente na anulación de los recortes, sinón que más bien los perpetúen: 

  • Sólo s’atendieron 4 de les reclamaciones que planteguemos los sindicatos na mesa técnica previa a la mesa final.
  • Munches de les reclamaciones de los centros referentes a les unidaes y el númberu d’elles que tien cada escuela constitúin la principal variable de la que depende l’asignación de plantiyes. La Dirección Xeneral  de Personal Docente, que presidió laa mesa,  diz nun tomar decisiones que cinquen a unidaes y, polo tanto, nun tuvo en cuenta les reclamaciones de les organizaciones sindicales nesti sen. Esta decisión elimina de la negociación una  variable determinante de les plantiyes y neutraliza asina en gran parte la capacidá negociadora de la parte social. SUATEA demandó qu’en próximes negociaciones se dea información sobre les unidaes y se puea negociar sobre elles.
  • Nun respuenden de manera afayadiza a les necesidaes d’atención a la diversidá que demanden los centros al tener solo en cuenta al alumnáu de Necesidaes Educatives Especiales (NEE) y desprecien  al alumnáu con Necesidaes Específiques d’Apoyu Educativu  (NEAE). Mermen 32 puestos d’apoyu al ámbitu sociollingüísticu y científico-técnicu, que suponen un drásticu recorte n’atención a la diversidá en Secundaria y ello magar que nel proyectu de la nueva llei d’Educación se prevé la necesidá d’ellos. 
  • Nes etapes básiques d’Educación Infantil y Primaria  síguese cola tónica de perda de places de cursos pasaos debío a una baxada de la natalidá y al abandonu de la escuela rural. Debería aprovechase aquella circunstancia pa baxar les ratios d’Infantil y Primaria, y fai falta un compromisu real cola escuela rural.   
  • Nun cubren toles unidaes de Primaria con tutoríes qu’esclusivamente impartan les aries de la especialidá de Primaria.
  • Nun aumenten los puestos na proporción razonable: p’acabar cola pérdida de profesoráu que se vien sufriendo dende los años de la “crisis”; nin pa mermar l’horariu llectivu a 18/23 h en Maestros/es y Secundaria; nin pa baxar 2 hores llectives al profesoráu de más de 55 años. 
  • Hai munches places de “necesidaes autorizaes” que son de plantiyes (estructurales). Pasa’l tiempu y nueves propuestes y nun s’integren nes plantiyes.  Ello da llugar a que la plantiya de “necesidaes” seya cuasi un terciu de la total, lo qu’usurpa a la parte social equí representada, el so derechu a la negociación y da manga ancha a l’alministración en la movilidá de plantiyes xenerando inestabilidá, precariedá nel emplegu (aumentu de medies xornaes nel profesorá interino) y la consecuente perda de calidá educativa. 
  • Depués d’años de reivindicación de la Especialidá de Llingua Asturiana y Gallego-Asturrianu, siguen ensin incluyise nes plantiyes estes especialidaes, nin se fai nenguna previsión o estudiu pa cursos venideros.  
  • Incúmplense, por too ello, los Alcuerdos de Plantiyes soscritos colos sindicatos.  

Cola  propuesta de plantiyes presentada nun s’acolumbra nel futuru próximu nenguna señal que suponga la meyora de la calidá educativa nin de la situación llaboral del profesoráu asturianu.  

El Secretariáu de SUATEA

N’Uviéu a 10 de febreru de 2020

Esta entrada también está disponible en: Castellanu


Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344

Notice: ob_end_flush(): failed to send buffer of zlib output compression (1) in /usr/home/suatea/www/wp-includes/functions.php on line 4344