SUATEA refuga la plantiya final propuesta pola Conseyería

Esta entrada está disponible en: Castellano (Castellanu)

Sin-título-1SUATEA REFUGA LA PLANTIYA PROPUESTA FINALMENTE POR  EDUCACIÓN Y ESIXE QUE NUN SE CIERRE NENGUNA AULA PÚBLICA MIENTRES SE CALTIENEN LOS CONCIERTOS EDUCATIVOS

Na Mesa Sectorial que concluyía güei, SUATEA llamentaba que la Conseyería d’Educación, tres años de destrucción d’empléu na rede pública, namá propunxera la creación neta d’unos cincuenta places docentes pal próximu cursu.

Tratase d’una cifra risible teniendo en cuenta los cientos de places perdíes los últimos años. La precariedá na escuela pública asturiana ta sirvida pal próximu cursu. Nun se garantiza la esistencia de plantiyes estables nos centros, daqué fundamental p’atender a la diversidá, llevar a cabo proyectos educativos y garantizar una enseñanza calidable.

Na Mesa’l nuesu sindicatu esixó un cambéu drásticu nes condiciones llaborales del profesoráu al traviés del amenorgamientu del horariu lectivu y del númberu  d’alumnos y alumnes per aula. Esixó la inmediata apertura de negociaciones pa consiguir  una ampliación de plantiyes. D’esta forma crearíase empléu estable y acabaríase cola precariedá nesti sector. Esta propuesta foi refugada pola alministración, qu’amuesa asina’l so despreciu escontra profesoráu que trabaya en Asturies condergándo-y a los peores horarios del estáu, aplicando la LOMCE  a raxatabla, suprimiendo places d’atención a la diversidá, o nun dotando d’orientadores a tolos centros que los reclamen y suprimiendo puestos como los de Pedagoxía Terapéutica fundamentales p’ayudar al alumnáu que más precisa de sofitu educativu….

Tamién se llamentó la falta de cumplimientu de los alcuerdos de plantiyes y el zarru d’unidaes n’educación infantil tantu en zones rurales como urbanes. Esti zarru trai de resultes la perda de profesoráu que va tener efectu apoderó pa próximos cursos, SUATEA plantegó a l’alministración que yera inadmitible’l zarru d’unidaes nos centros públicos cola consiguiente perda de puestos de trabayu mientres se caltengan conciertos con centros privaos.

L’alministración, al traviés del Director Xeneral de Personal refugó la propuesta ensin argumentu dalgunu. Y asina concluyó la Mesa Sectorial. Col refugu per parte de SUATEA y del restu de sindicatos a l’aprobación de la plantiya.

Nos centros educativos esiste un clamor p’acabar colos retayos y col deterioru de les condiciones llaborales, pero la Conseyería fai oyíos sordos. Cada vez se fai más necesaria la movilización, como la que se plantega pal próximu martes 14 de febreru n’Uviéu (pasacalles MSEPA) y la fuelga contra la LOMCE y los retayos el 9 de marzu.

Secretaríau de SUATEA

9 de febreru de 2017

Print Friendly, PDF & Email

Esta entrada está disponible en: Castellano (Castellanu)