SUATEA recurre los cuestionarios la reválida de 6º Primaria

LA CONFEDERACIÓN DE STES-INTERSINDICAL (na que s’integra SUATEA) RECURRE LOS LLAMAOS CUESTIONARIOS DE CONTESTU PA LA REVÁLIDA DE 6^u DE PRIMARIA Y ESIXE  A LES DISTINTES ALMINISTRACIONES LA PARALIZACIÓN INMEDIATA DE TOLES REVÁLIDES

El ministru Méndez de Vigo, en plena precampaña electoral y consciente de que la inmensa mayoría de la comunidá educativa refuga la LOMCE y los sos desenvolvimientos, lleva unos díes anunciando midíes pa intentar descafeinar el calter segregador  y elitista d’esta desfamada Llei. La reválida de Bachilleratu foi presentada pol ministru como una continuación de la PAU, esaniciando la obligatoriedá de celebración nun mesmu día y con un mesmu conteníu pa tol estáu. La reválida de 4^u foi oxetu apocayá d’una operación de maquillaxe similar. Pero lo que’l ministru nun diz ye que quien nun supere eses pruebes va quedar ensin titulación, que nun van sirvir de nada los años emplegaos pol alumnáu nin el llabor del profesoráu que-yos impartió les materies y que los evaluó conociéndolos personalmente. El ministru nun menta que, de nun aprobar la reválida correspondiente, l’alumnu o l’alumna nun va poder siguir los sos estudios, que nada hai previsto pa quien aprobara 2 ^u de Bachilleratu o 4 ^u d’ESO y sicasí suspenda la reválida.

Tocantes a la reválida de 6 ^u de primaria, el Secretariáu de SUATEA decidió presentar recursu como miembru de la Confederación de STEs-Intersindical contra los llamaos “Cuestionarios de contestu publicaos pol MECD nel BOE del 15 d’abril. Nesi testu indícase que los citaos cuestionarios van dexar pañar información sobre les condiciones socioeconómiques y culturales pa contestualizar les resultancies llograes nes reválides: trátase de poner en conocencia de la comunidá educativa les  resultancies de les evaluaciones finales, tal como diz testualmente el Resolvimientu de la Secretaría d’Estáu d’Educación.

Pa la puesta en marcha de la reválida final de Primaria, que delles CCAA entainen a llevar a cabu a lo llargo d’esti mes de mayu, el ministru nin se dignó a axuntase enantes coles Conseyeríes d’Educación y llindóse a publicar nel BOE los “Cuestionarios de contestu”, incluyendo entrugues y opciones de respuesta OBLIGATORIES pa tolos territorios que realicen eses pruebes.

Nel cuestionariu, dirixíu a un alumnáu de 11 o 12 años, plantégense una serie d’entrugues  con cuatro posibles  respuestes onde la so exa central ye que l’alumnáu evalúe al so profesoráu. De 42 cuestiones que tienen de responder los neños y neñes de 6 ^u de primaria, 22 cinquen al profesoráu. Los niveles de respuesta son: Nunca o casi nunca/Delles vegaes/ Casi siempres/ Siempres o Nada d’alcuerdu/ Pocu d’alcuerdu/Abondo d’alcuerdu/Bien d’alcuerdu.  Tratar de cuestiones que non yá nun  nada tienen que ver col contestu socioeconómicu, sinón que l’alumnáu  d’esta edá nun ta n’absoluto capacitáo pa responder  a les mesmes.

Al respective de los cuestionarios destinaos a les families y a les direcciones de los centros, el calter sesgáu de los ítems ye más qu’evidente: tres la redacción de los mesmos puede vese la intención del MECD d’intentar culpar al profesoráu y a les families de “llindar la eficacia de la xestión” de los centros.  Na redacción sobre les situaciones que pueden suponer un problema nel so centru, tanto’l profesoráu como les families apaecen como xeneradores de conflictos.

La intención del MECD ye la d’empobinar el desarrollu de les pruebes, despintar la perda de la equidá nel nuesu sistema educativu de resultes de la crisis y los retayos y resalvar les graves situaciones socioeconómiques de millones de neños y neñes. Per otra parte trátase d’utilizar   les informaciones percanciaes pa ellaborar clasificaciones de centros, como yá se ta faciendo en delles CCAA con consecuencies nel  salariu del profesoráu.

Hai, poro, una contradicción ente les afirmaciones de calter electoralista del ministru nel sentíu d’amenorgar los efectos de les reválides y lo yá publicao nel BOE. De les resultancies de les reválides y los sos “Cuestionarios de contestu” va depender la orientación  que l’alumnáu reciba cuando llegue al Institutu según la so posible inclusión en programes como los PMAR que suponen la segregación temprana del alumnáu a partir de 2 ^u d’ESO.

Por too ello, SUATEA, na Confederación de STEs-Intersindical va recurrir el Resolvimientu de 30 de marzu publicada nel BOE del 15 d’abril sobre los “Cuestionarios de contestu” pa la evaluación final de Primaria,  de la qu’esixe a les distintes Alministraciones educatives la paralización inmediata de la realización d’eses pruebes por suponer una grave vulneración  de los derechos de los distintos miembros de la Comunidá educativa.

El Secretariáu de SUATEA

Uviéu 5 de mayu de 2016