SUATEA | Sindicatu Unitariu Autónomu de Trabayadores de la Enseñanza d'Asturies educación, asturias, educastur, oposiciones, enseñanza, marea verde, pública, escuela, colegio, instituto, interinos,
Esta entrada está disponible en: Castellano (Castellanu)
Güei tuvo llugar la Mesa Sectorial Docente pola que se regula’l procedimientu pa la reconocencia del allongamientu de la permanencia nel serviciu activu.
Dende SUATEA encamentamos a l’Alministración por que considere la Xubilación voluntaria antemanada a los 55 años y la xubilación col 100% de les retribuciones, a los 30 años de serviciu o a los 60 d’edá. Y como la lexislación educativa permite facelo, que s’entamen a arbitrar les midíes necesaries pa l’aplicación del amenorgamientu de xornada lectiva pa mayores de 55.
El decretu presentáu regula l’allongamientu de la permanencia nel serviciu activu y establez los criterios organizativos y de calter económicu y presupuestariu que puen llevar a la denegación d’esti allongamientu a les persones solicitantes. Estos criterios escuenden una clara intención de caltener l’actual política de retayos y amortización de places, por ello SUATEA solicitó que nel decretu se reflexara por escrito que les places que quedaren vacantes por xubilación pasen a ser ocupaes por funcionarios/es interinos/es hasta la so cobertoria por personal funcionariu con calter definitivu. Esta solicitú foi refugada pola Alministración.
En SUATEA consideramos que ye obligación de l’Alministración dar tresparencia a los distintos procesos alministrativos, velar polos derechos de los sos trabayadores y asegurar el bon funcionamientu de los servicios públicos asturianos, lo qu’implica una dotación fayadiza de personal y más nun ámbitu tan sensible como l’educativu.
Dende SUATEA reclamamos la criación d’empléu, tamos en contra de l’amortización de places y esiximos un 100% de la tasa de reposición al traviés de la ufierta d’empléu públicu. Refugamos la prórroga de la vida llaboral y consideramos que si dalguna persona nun algamó los períodos de cotización necesarios pa llograr el 100% de la xubilación a la edá de xubilación llegalmente establecida, tien que ser l’Alministración quien arbitre les midíes por que llogre esi 100% ensin qu’ello suponga l’allongamientu de l’actividá llaboral.
La negociación finó güei ensin la firma de SUATEA d’esti decretu.
El Secretariáu de SUATEA
Uviéu 30 de mayu de 2014
Esta entrada está disponible en: Castellano (Castellanu)
